يَـ سرّ و من خُزانة خالِقه اتنَـزَّل
الدنيا بحـَلّـه محتارة و بقَت تسأل
يقرآن الوفى و تقـراك
ايـّام الدهـر مَوقِف
صعب تفسيرك و معناك
الدنِيا بهيبِتَك تِحـْلِـف
حُروف اسمَك سِوَر بالغيرة تترتّـل
اشما تتكـرّر اعله الدنيا ما تِنمَـل
چفوفك فرات..تروي الحياة..وين الممات
من عِدها وين؟
راسك سمـاء..للكبريــاء..كـِلّـَك إبـاء
من الحُسيَـن
****
يعبّاس بصفاتَك شخصك اتفرّد
صِرت للغيرة كعبة و بيك تتعبّد
اسافر لك بلا جنحان
و اطوف بروحي يم سِرَّك
و اجي لك جيّة العطشان
و ظماي يموت يم نَهرك
اجي لبابَك يتيم لعطفك اتودّد
و علي الكرار احسّن بيك يتجسّد
باب الإله..و سر مُحتواه..يبلغ مُنــاه
كل من يجيك
دمع الشموع..فِيض الدموع..بحالــةخُشوع
صلَّت عليك
****
اجيت لكربلا بحسراتي و الونـّة
ادوّر سِر خُلـودَك و اقتـرِب منّه
دخَلت لعالمَك مولاي
و جلالَك زاد لي الحيــرة
و لگيتك سِـر حياة الماي
تموت الدنيا من غَـــيره
الملايـك للعزاء افـواج تتعنـّه
و ثِگل غيم الفجيعة ابدمعة الجنّة
يَبن الخُـلود..مثل الورود..بكل الوجود
حَـلّ الذبـول
قبرَك مدار..للدنيا صار..مو بس مزار
يغشي العقـول
الشاعر مرتضى الشمري
رد مع اقتباس
المشاركة الأصلية كتبت بواسطة ♡ Zahraa Al obaidi ♡
