السلام عليكم ..
صراحة احتاريت وين اخلي هذا الموضوع بقسم قصص الاعضاء لو بالنقاشات لو بقسم الاسئلة لكن صفيت رأيي ع الاخير بما انو الغرض من الموضوع هو سؤال
وقبل طرح السؤال تحتاجون تعرفون شي عن خلفية السؤال وراح احجي بشكل عام في بعض المواقف فماكو حاجة لأحد ان يتنرفز.
اني اهلي ولدوا وعاشوا بالناصرية وأغلبكم تعرفون طريقة الحياة بالمحافظات الجنوبية واطباع اهلها .. منها إلي ما تعجبني الغيرة "الزايدة" وسرعة الغضب والدم الحار غالبية الوقت والعمل بطريقة سريع مع اغلب الامور حتى إلي ما تحتاج سرعة .
اما اني فولدت وعشت بكركوك فأخذت ع اطباع اهل كركوك منها حب الهدوء والابتعاد عن العصبية وبرود الدم .
فهذا الشي سببلي مشاكل ويه اهلي خصوصاً في طفولتي بسبب اختلاف اطباعنه .. فجانوا اهلي دائماً يعاملوني بطريقة صعبة ويحجون عليّ هواي
وما يعترفون بأي شي اقدمه او احاول اقدمه ويعتبروني شخص لا فائدة منه ومستقبله مجهول وجنت هواي اسمع منهم كلام يخدش بالكلب.
(والله ما ادري شلون راح تصير من تكبر)! هاي الجملة ضلت براسي من كثر ما تألمت منها رغم اني سامعها قبل اكثر من 4 سنوات
وهلشي سبب ابتعادي عن اهلي وصرت منعزل ع نفسي دائماً ومستمر بسماع الكلام الجارح واصمت واصمت واستمر بالصمت .
والحصة الاكبر من الكلام كان من الوالد "الله يحفظة " عاملني اني واخواني بطريقة قاسية ولازال مستمر بهل معاملة (لكن مو مثل قساوة قبل)
لذلك عشت طفولة افتقد بيها حنان الاب وحبه ..سنة ورة سنة يزداد ألمي وأنعدام ثقتي بنفسي وزيادة انعزالي وانطوائيتي بسبب اهلي
ومن دخلت الاعدادية تحديداً من صرت بالخامس بديت اقرة واثقف نفسي واتعلم وبنيت مستقبلي وهيأت نفسي وانشات طموحي الخاص وبدأت بالعمل لأجل مستقبلي حامل ع ظهري كل الكلمات الجارحة إلي مازالت مستمر لحد اليوم . *طبعا كل الفضل يعود لشخص ساعدني في تغيير نفسي*
فصار تعاملي مع اهلي شوية احسن وبدوا اهلي يحسون بالتغيير إلي صار بحياتي وانو اني صرت شخص مختلف ..
وتعاملي ويه الوالد صار افضل من قبل بشوية لكن.. مو بالمستوى المطلوب ابداً !!
نجي هسا للمهم ..
- ابوي باليوم العادي اتكلم وياه عدد كلمات لا يتعدى ال20 كلمة وتكون اما عن خبر حصل او شي بالبيت (مثلا يكلي وين علاوي واني اكله علاوي فوك)
- دائماً اكون متخوف من الجلوس اني وياه بغرفة وحدة واكون قلق جداً لان الوالد علمنه ان نخاف منه قبل ان يعلمنا احترامه وحبه .
- اجنبه دوماً وحتى ما اباوع بعيونة .
- من يروح لسفر او يرجع .. اريد ابوس جبهته او إيدة بس ما اكدر من الخوف عكس امي إلي اقبل راسها وإيدها بكل حب .
- علمنا اغلب الامور بالحياة عن طريق الإهانة والعصبية .
- بعد اكو هواي شغلات بس اريد اقتصر علمود لا اطول عليكم .
- رغم كل هذا اني احبه "حب محدود" احبه بالقدر إلي انطاني ياه من حب الابوة فقط .
ما اكدر احبة اكثر من هذا لان فاقد الشي لا يعطيه واني ما عندي غير القليل من حب الابوة وجاي استثمر هلشي بالاحترام إلي اقدمه إله .
السؤال هذا ؟
اذا اني ربيت وعلمت اولادي مستقبلاً بطريقة مخلتفة جداً عن الطريقة إلي علمنا وربانا بيها ابوي فهل راح يكرورن وياي نفس تعاملي مع ابوي ام يعطوني من حبهم بقدر ما اعطيتهم من حبي لهم ؟
لان نعرف إلي يعامل ابوه بطريقة راح يعامله ابنة بنفس الطريقة
رد مع اقتباس
