أمك انا يا حسين طفلك وين دليني
للشاعر الاديب جابر الكاظمي
أمك انا يا حسين طفلك وين دليني ... صار الجرح جرحين بالطفلين واسيني
الـ محسن دليلي ينوح ولطفلك المذبوح ... صار الجرح جرحين بالطفلين واسيني
هاي الوديعه بنار الفجيعه للطف اجت هاليوم
كَايدها همها وبجف هضمها لزمت ضلع مهشوم
بذيج البوادي تنعى وتنادي اه يا بني يا مظلوم
حيرني وضعك يا بني واسمعك تحجي ويه هاي القوم
لطفلك تريد الماي شنهو الراي يوليدي ... اعصر الك عيناي ماي حشاي لو بيدي
عليك القلب مجروح ولطفلك المذبوح ... صار الجرح جرحين بالطففلين واسيني
امك انا يا حسين طفلك وين دليني ... صار الجرح جرحين بالطفلين واسيني
المحسن دليلي ينوح ولطفلك المذبوح ... صار الجرح جرحين بالطفلين واسيني
هاي آنه امك يوليدي يمك جيت بقلب ولهان
حين اعتنيتك حاير لقيتك شايل طفل عطشان
محد يطيعك ويرحم رضيعك لا ترتجي العدوان
خل يبقى ظامي واسمع كلامي رد يا بني للصيوان
امك واجيت انخاك واترجاك بالعبرة ... اخذ الطفل وياك امه هناك تنتظره
ليك النظر مشبوح ولطفك المذبوح ... صار الجرح جرحين بالطفلين واسيني
امك انا يا حسين طفلك وين دليني .. صار الجرح جرحين بالطفلين واسيني
المحسن دليلي ينوح ولطفلك المذبوح ... صار الجرح جرحين بالطفلين واسيني
حساب الـ حسبته بالطف عرفته وتوقعت هالحال
طفلك تصوب بالدم تخضب دمه على جفك سال
سهم المنية اثر عليه ادري السهم جتال
هاي انا مثلك ابجي على طفلك واتمرد الدلال
لعبدلله روحي تحوم تجري دموم عبراتي ... وعيوني جنها غيوم تمطر لوم دمعاتي
ليك الدمع مسفوح ولطفلك المذبوح .. صار الجرح جرحين بالطفلين واسيني
امك انا يا حسين طفلك وين دليني ... صار الجرح جرحين بالطفلين واسيني
المحسن دليلي ينوح ولطفلك المذبوح ... صار الجرح جرحين بالطفلين واسيني
وحدك اشوفك وشلون اعوفك بين العدى ومحتار
يحسين اخبرك لمن انظرك اتذكر الكرار
مثلك تحير حاله وتغير من هجموا على الدار
عبدلله شفته المحسن ذكرته ذكرني بالبسمار
لعبدلله راسي شاب قلبي ذاب واتالم ... وتذكرت بالباب ضلعي انصاب وتهشم
لمحسن حزينة الروح ولطفلك المذبوح ... صار الجرح جرحين بالطفلين واسيني
امك انا يحسين طفلك وين دليني ... صار الجرح جرحين بالطفلين وياسيني
المحسن دليلي ينوح ولطفلك المذبوح ... صار الجرح جرحين بالطفلين واسيني
يوليدي تدري عذبني دهري مفجوعه بالاولاد
المحسن هضمني وطفلك يهمني ما ناغوا ابــ امهاد
والموت اخذهم وحرمني منهم صبر القلب ما فاد
هاج وتأثر ضلع الـ تكسر هالليلة كسره انعاد
ضلع بصبر مسنود قلت تهون اهاتي ... ما ادري راح تعود ليه ردود لوعاتي
زاد على ضلعي النوح ولطفلك المذبوح ... صار الجرح جرحين بالطفلين واسيني
امك انه يحسين طفلك وين دليني ... صار الجرح جرحين بالطفلين واسيني
المحسن دليلي ينوح ولطفلك المذبوح ... صار الجرح جرحين بالطفلين واسيني
يا حسين اريدك تنطيني بايدك طفلك وابات وياه
واقعد واساهر يمه واناطر جايز يفك عيناه
واحجي له حالي وهضم الليالي بيه شعمل فرقاه
واعصر له مدمع وبجفني يرضع يغفى على جرف الاه
اعصر دمع واسقيه وتناغيه وناتي ... تسهر مهجتي عليه وتباريه حسراتي
لاجلك حملت جروح ولطفلك المذبوح ... صار الجرح جرحين بالطفلين واسيني
امك انا يحسين طفلك وين دليني ... صار الجرح جرحين بالطفلين واسيني
المحسن دليلي ينوح ولطفل المذبوح ... صار الجرح جرحين بالطفلين واسيني
رد مع اقتباس
..
المشاركة الأصلية كتبت بواسطة ♡ Zahraa Al obaidi ♡
