َ
لم افكر ان اضع موضوع بعد موضوع
لكن ... انا لله وانا اليه راجعون
الشهيد الشاعر حسين الشيخ هادي امنيته كانت ان يسير حتى ولو خطوه واحده من كرسيه حتى ولو كانت لمقبره وادي السلام وتحقق امنيته وخطفه الارهاب يوم امس في الناصريه وهذه هي قصيدته
من حضن امي.. كُبَل للكرسي اجيت
ما سمعت ال (فدوه لله) ويمشي كام
اتكسرن خطواتي واحساسي بصباي
الكاع صخره..وجانت الخطوات جام
وسجلوني بصف الاول..واستحيت
الروح احسها تفرفح من اسمع قياام
وابجي كل رفعة علم يوم الخميس
فشله اكعد..والعلم بالساحه كام
بالمرايا امنيتي اشوفن طولي يوم
سنين اباوع طولي بفراشي من انام
وأمْلوني..اباجر ..واصبر بقيت
وباجر أتأخر.....وإجن عشرين عام
كبرنه....والايام تمشي ,,وما مشيت
وانه والكرسي عشت قصة غرام
ياهو يرضه بطير مكسور الجناح ؟؟؟
والسمه كبال ايده غصت بالحمام
الدمعه سوده من الحزن عالخد تطيح
المادره بحزني يظن بخدودي شام
جفوف اديّه استهلكت من الدعاء
وضلت لهذا الوكت رجليّه خام
ربي..كعد حظي حتى اكدر اكوم
ربي بس كطرة ضُوَه لحَلْك الظلام
خطوه وحده...امنيتي امشي..بأي طريق
حتى لو للمكبرة ..لوادي السلام
.
رد مع اقتباس
..حسن الشيخ هادي..