اجه طيفك
غريب امتيه دروبه
اجه
ولاعين التلفيه
ولافرشت جفنها .. الجيته محبوبه
اجه طيفك
يدك بيبان
ياجفن اليدك
امقفله بوبة
اجه يعاتب ... نشيد اهله .. ولكه الدله ابمضيف الحسره مصلوبه
شاف الناس تشرب بالجماجم ماي!
صاح شمال هاي الناس؟ وشماله شهر عاشور مامش ماي بحبوبه؟
ظل عطشان
يترجه يكت الغيم .. عاين فوك .. لن الغيم يلحس ماي حالوبه
واستغرب نشد روحه ولك ياروح
شو حس الفشك مبحوح
شوحكنه مسيح انسمر ويه اللوح
شو غركت سفينة نوح
شو كف البحر ماحنته دوبه
ولامذنب لزم شباك كلبه وكفر ذنوبه
ولا للطيف من نباك من عين الزلم حوبه
وصرخ
لايامذلة سندباد العرب لويدري العرب تغرق
ولاراد الملاحه
ياهظيمة جبل طارق
لوبجه اعله حفاد طارق
لوصفك راحه اعله راحه
يالغز بومة تلاوت وي نسر كسرت جناحه
يازلمنه الليل طول
ليل يمته الثار يكرمنه بصباحه
يلحجيكم بنادق
والبنادق هلوكت تحجي بفصاحه
كاظم اسماعيل الكاطع
رد مع اقتباس
