بالك تستهين ابخلقت الدود!-حسين الساعدي
مو كلمن قريب ايشوفك الزود
ولاكلمن بعيد اتظنه ناسيك
موجود اليوافي ! وناكر الجود!
وذوله اثنينهم وكتك يراويك
أنطيك الامثال ابهاي الحدود
لازم تعرف الناس التمر بيك
يصح منك وبيك ايصيح فرهود
لو تنكسر يمه اشكد يبجيك!
ويصح واحد ولا ظنيته موجود
إولمن تنكسر هو اليداريك!
أكو ماله وجود وهو مولود
ما يثبت وجوده إوما يلاكيك!
وأكو عايش تشوفه وهو مفقود
ما غابت اعلومه إوما يجافيك!
ممكن ضدك ايصيرون الشهود
انته اتجيبهم بس شهدوا اعليك!
مو كل الكلام اتظنه مقصود!
بيهم ماقصد واشكد يأذيك!!
لو باب البشر بالعازه مسدود
ربك ما يسد بابه ويرضيك
الله الزارع ومتنوع العود
وبلمخلوق أكو حكمه التوافيك
بالك تستهين ابخلقت الدود
هذا ابلا لحم باجر يخليك!
حسين االساعدي
رد مع اقتباس
المشاركة الأصلية كتبت بواسطة ♡ Zahraa Al obaidi ♡
