مات إلي أحبة وراح عـــنـــي بعيد
ويا موت الخذيتة شلون راح أصبر
إلمن راح أعايد من يجـــي العــــيد
ويا عيد اليمرني أن چان مايحضـر
أبوية التعب لجلي شكثر چـان يريد
يخلص سنين عمرة لجلي حتى اكــبر
وغشيم أنه ومكيف سنيني دزيـــــــد
وتزيد اسنينة اثاري وياي دا يكـبـر
شيرجع أيامنا يابــــــــوية شيعيد
ذيچ الذكريات وكون عـــاد ازغر
شجنيت انه بسنيني وعمري شيفيد
رحت عني وبقيت لشوفك اتحســـر
أحط راسي أعله صدرك وكلشي ماريد
على فراگك يبوية شلون ما اگــــدر
بعد موتك يبوية اجروحي متهيد
واظل طفل بغيابك جدمي يتعثر
ويظل طيفك گبالي وعني ميحيد
وتلاعبني وضحكتك دوم اتصور
واركض بالحديقة وانتة متريد
وتناديني يوليدي خاف تتعور
شنسة انه منك ياهي بالتحديد
بأول ابتدائي تخططلي بالدفتر
شنسة العسكرية وياي بالتجنيد
اووگفاتك إلي لحد ماخذت دفتر
انه بدونك يبوية اهمومي ازيد
وبجفاك انه زماني هواي بية افتر
شگلك نادم انه الندم شيفيد
غصيت بعبرتي إلفظها ما اگدر
شگلك اخرس انه وللنطق ما اجيد
من يمر طاريك كل احوالي تتغير
رد مع اقتباس
المشاركة الأصلية كتبت بواسطة ♡ Zahraa Al obaidi ♡
