مرحبا ...
هذا موقف مر عليه عام تقريبا ً ....
بس اليوم عندي واهس اسولف ...
كنت في ايفاد الى احدى الدول العربية ، كانت دورة تدريبية برعاية منظمة الصحة العالمية ...
المنظمة هي اللي حجزت الطيران ...
كانت الخطوط الناقلة هي القطرية ..و كان بالذهاب و العودة اكو ترانزيت بالدوحة ...
ترانزيت العودة كان قصير جدا ...ساعة وحدة فقط .
و كنا فرحانين جداً انه الترانزيت قصير لأن تعبانين و نريد نرجع لأهلنا ..
و لكن !
من يومها عرفت شگد الترانزيت القصير خطر ..و لازم الكل تخلي هالشي ابالها .
اللي صار انه كنا بدولة الايفاد دننتظر طائرة العودة اللي رح تودينا للدوحة و منها لبغداد ...
الطائرة تأخرت ...تأخرت لمدة ساعة ...
و من صعدنا ..الطيار بلغنا انه رح يطير على ارتفاع اعلى حتى نوصل اسرع ..على اعتبار اكو ناس عندها رحلات لاحقة ..و من ضمنها احنا جماعة بغداد اللي ترانزيتنا البلوة ساااعة فقط .
وصلنا للدوحة في الوقت اللي كانت الطائرة المتوجهة لبغداد دتطير . ...شلون ..شراح نسوي ..الطيارة راحت ...
الجماعة بالمطار صار عدهم علم ...و الموظفين بدوا يشرحولنا خياراتنا ..
طبعا الموظفين كلهم اجانب ..ماكو قطريين ..
فهمونا انه اول خيار ان نبات بالدوحة و ثاني يوم بالثنتين الظهر اكو رحلة لبغداد ( طبعا الحچي احنا وصلنا ساعة ٧ المغرب للدوحة )...يعني الرحلة بعد ١٨ ساعة ...
الخيار الثاني ، كان ان نستقل طائرة لدبي عند منتصف الليل ...و ساعة ٨ الصبح اكو رحلة من دبي لبغداد ..
يمعودين صدك چذب. .عدلوا بدلوا ...ماكوو ..
گالوا اختاروا هسة حتى نحجزلكم ...
فكرت بالمبيت بالدوحة و رحلة ساعة ٢ اليوم التالي ..يعني هذا اقرب للمنطق ..
گتله بس لازم تنطونا غرفة بفندق حتى نبات ( و هو التصرف الطبيعي و المعتاد لما تصير هيچ اخطاء )...الموظف المسكين ..باوع على جوازي ( السويسري خخخخ) و گال لي بلهجة مستحية ..آسف مدام ..احنا هذا الجواز ما نمنح صاحبه غرف بفندق ...لازم تبقين بالمطار تنتظرين عالمصاطب !!!!
باوعت عليه ما مصدگة ...اثاري الحچي صدگ ..و التعامل وية العراقيين بمنتهى السخافة جاري فعلا و مو اشاعات ...
التفتت لزملائي بالايفاد ..گالوا نروح لدبي و الله كريم ع الاقل الطيارة لبغداد ساعة ٨ الصبح ..١٢ ساعة نلتهي صاعدين نازلين من طيارة لطيارة و من مطار لمطار احسن ما ننتظر ع المصاطب !
شأگوللكم ...الامران احلاهما مر ...گلت حشر ٌ مع الناس عيد ..نروح لدبي و امرنا لله .
و هكذا كان ...صعدنا كيا لدبي و كوستر للعلاوي ..ههه...و كان فد شي غريب عجيب ..گضينا الليلة بين المطارات و الطيارات ...و الاسواق الحرة ...
بالبداية كنت عصبية ..بعدين زميلة گالت كلمة هدأتني ( ماكو قدم تتقدم او تتراجع الا بأمر من الله ) ..و استسلمنا للمكتوب ..
بس رجعتنا من دبي لبغداد كانت على الخطوط الاماراتية ...و كانوا رائعين جداً ...
الخلاصة : ديروا بالكم من الترانزيت القصير
و سلمولي على قطر
تحية لكم .
رد مع اقتباس
.. لو رايحين من البداية لدبي عاد تفترون شوية تشوفون مولات واذا تاخرتو ساعة كم ع العراق ملحيكن عليه قابل وين يروح .. ايفاد وترانزيت سعيد .. حمد الله ع السلامة
