هنا

[ارجع يازمان]

اشكد حلو وشفاف ماكو ابجماله
حته الوراه ينشاف يضوي ابخياله!

حاير شوصف اهواي كدامي ضوهَ
مدري الكمر بلكاع ما ادري هوه!

كهرب هذاك اليوم حته الشوارع
شافو كمر خطار من يمنه طالع!

كلمن يجيب اهواه وتتسابق الناس
لو حجبيت اهواي هم ياخذ الكاس

رايد اوصف اهواي عود انه شاعر
صافن كبل سنتين والهسه حاير!

الحلو والمملوح والضوه العيون!
حطهم ابصف اهواي راحو يضيعون!

عاقل يوصف اهواي؟ ما اصدك ابهاي
بس وصفة المجنون تتوالم اوياي!

بالك توصف اهواك يم اليحسدون
مثل الرصاص اتصيب فطنات العيون!

اعيونه موش اعيون كلش عجيبه
العاين الهن زين يلكه المصيبه!

شايف ورد ويفوت كدامك اشلون؟
ما تشبع ابتصوير طماعه العيون

ياهو اليشوفه ايصير بالصفنه كاعد
والهسه بالصفنات تلكه السواعد!

كل الجمال اهواي ويه اللطافه
خله الكرخ يندار لاهل الرصافه!

وجهك شمس تموز وتودر العين
خفف ضواك اشواي ويه المساكين!

اعيونه قناصات واحلفلك اني
مايكدر اكبر جيش يصمد ثواني!

عاينته مدري اشلون! مدري اشجاني
من وصفيت اهواي سكر لفاني!

لو يوكف اويه البيض طلعن عجايز
لو صبغيته ابطين! هم هو فايز!!

بشفافه طعم الموز لا والله خوخه
عاينته ذاك اليوم سببلي دوخه!

حاير شوصف اهواي متحير انه
خله الكمر مظموم ماخذ مكانه!

كثر الجمال البيه زيد نحيبي
ينشحط كلمن شاف ضحكة حبيبي!

وصفته للجيران صاحو دخيلك
خفف ابوصف اهواك مابينه حيلك!

لمن يمر اهواي لازم تغمضون
الشمس وكت الليل تتحده العيون!

خابصنه بس بهواك لو تنظر اهواي
​باول دقيقه اهناك جا توكع اوياي!
حسين االساعدي

[NO OR]

اعيونه موش اعيون كلش عجيبه
العاين الهن زين يلكه المصيبه!

..
شكرا

[محامي الحب]

بالك توصف اهواك يم اليحسدون
مثل الرصاص اتصيب فطنات العيون!

[سومر]

بشفافه طعم الموز لا والله خوخه
عاينته ذاك اليوم سببلي دوخه

[ارجع يازمان]

ا
عيونه موش اعيون كلش عجيبه
العاين الهن زين يلكه المصيبه!

..
شكرا

اختيار جمييل

[ارجع يازمان]

بالك توصف اهواك يم اليحسدون
مثل الرصاص اتصيب فطنات العيون!

ذووق جميل باختيار الدارمي بس بعد اكو اقوى منه بيهن هههه
شكرا لحضورك

[محمد الدون العراقي]

خابصنه بس بهواك لو تنظر اهواي
​باول دقيقه اهناك جا توكع اوياي!

[ارجع يازمان]

بشفافه طعم الموز لا والله خوخه
عاينته ذاك اليوم سببلي دوخه

شكرا لذائقتكم الروعه