هنا

[د. حسن سعيد]

سلام عليكم شلونكم اخوتي وخواتي؟
رح أكتب الموضوع باللهجة العامية حتى تكون بسيطة يفهمها الجميع ويكدرون يجاوبوني على أسئلتي، هم أخوكم مابيه يكتب فصحة لأن مخه مشوش بكم شغلة مو مال أكتب موضوع فصحة، خلي نبدي وياكم:
اخواني كلتلكم بالعنوان رايد أسولف وياكم كم سالوفة زغيرة وبصراحة محتاج مساعدتكم كون تتفضلون تجاوبوني على هالكم سؤال:
1. شنو نظرتكم عن المكفوف (مكفوف أو كفيف يعني أعمى يعني ما يشوف حبيت أوضح خاف واحد ما يعرف معناه) ، خلي أبسط السؤال شتعرفون عن الأعمى؟
2. برأيكم المكفوف يكدر يسوي شي لو ما يكدر ؟ زين اذا يكدر يسوي شي شنو الأشياء اللي يكدر يسويهن؟
3. المكفوف برأيكم يكدر يشتغل لو لا؟ وشنو الشغلات اللي ممكن يشتغلهن؟
4. برأيكم الأعمى يكدر ياكل ويشرب ويرتب ملابسه وغراضه البقية وحده لو يحتاج أحد يسويله هالسوالف؟
5. اذا واحد مكفوف يشتغل يكدر برأيكم يتزوج ويصير مسؤول عن بيت لو لا وليش؟
6. شتكولون المكفوف شخص معقد منطوي على نفسه ما يحب الاختلاط بالناس لو شخص عادي لو شنو بالضبط؟
7. اذا يوم طلعت وية مكفوف وكلك (رح أدليك المكان الفلاني) برأيك رح يدبرهة ويدليك لو يتيه؟
8. زين المكفوف يكدر يطلع يتمشى وحده لو ميكدر وليش؟
9. يكدر المكفوف يسوي شغلات البيت الصعبة -مثلاً ينصب مبردة أو يشد بواري ويبدل كلوبات وشمعات ويصلح المروحة و.....- لو ما يكدر وليش؟
10. المكفوف عنده عاطفة يعني هم يحب ويدور سوالف عشق ومدري شنو لو لا ؟
11. اذا يوم طلعت وية مكفوف تأمّن على نفسك؟
12. زين هالمكفوف بنظركم بس عينه ما تشتغل لو كل أعضاء جسمه خربانات بحيث يعجز ما يكدر يسوي شي؟
هذني أسئلتي أتمنى تجاوبوهن بصراحة .. أريد الشي اللي فعلاً تتصوروه مو تجاملوني وهالسوالف اللي تخرّب الشغل اللي جاي أشتغله وتروحون علية تعبي واللي عنده أسئلة حاب يطرحهن حول المكفوفين آني حاضر أجاوب على أي سؤال بخدمته حتى لو سألني (هم صارحت بالكلية؟) ويتدلل.
رحمة لموتاكم انطوني رأيكم بلا أي مجاملة لأن دا أشتغل وية فريق من الشباب المكفوفين والمعاقين رايدين نعرف نظرة المجتمع للكفيف شنو السلبيات والايجابيات اللي يتصوروهن بيه.
شكراً الكم مقدماً سامحوني على الاطالة وكثرة الأسئلة.

[غَياهِب]

ياهلا فيك اخوي
بداية احمد ربي واشكره على نعمه البصر وان شاء الله البصيرة ايضاً
نظرتي للمكفوف نظره تعاطف بسبب امور كثيركثيره
وثاني شي لايكلف الله نفساً الا وسعها يعني حسب قدرة الشخص اذا يكدر يسوي شي
ثالثا اي يكدر يشتغل او مايكدر والسبب نفس ثانيا
رابعا مادري ماسبق حصلتلي تجربه مع المكفوفين سواء كبار السن او صغار
خامسا نفس رابعا
سادسا حسب الي سمعته الاعمى قليل الاحتكاك بالناس لاسبابه الخاصه
سابعا اكيد يدليني لان خو مايزامط بشغله وهو مو كدها
ثامناً يكدر اذا كان من صغره مكفوف اما اذا اصبح كفيف على كبر ماعتقد يكدر
تاسعاً نفس ثامناً
عاشراً اكيد عنده عاطفه وله الحق يحب ويكره
احد عشر اذا كان كفيف من صغره اقدر اامن على نفسي اما اذا كان توه صاير كفيف لا ما اامن على نفسي
ثاني عشر اممممممم ماعتقد الكفيف من زمن الطفوله عنده شي ينقصه لان متعود ومتمرس
لكن المشكله للي يشوفون وبعدين يصيرون عميان ياخي انت من يمك قلبك يتقطع عشانهم







وتسلم للطرح المميز

[99999]

1. شنو نظرتكم عن المكفوف (مكفوف أو كفيف يعني أعمى يعني ما يشوف حبيت أوضح خاف واحد ما يعرف معناه) ،

الكفيف ، انسان حاله حالنا حنا ياللي نشوف وبالعكس له كله الاحترام والتقدير

خلي أبسط السؤال شتعرفون عن الأعمى؟

قادر يتزوج ، ينجب اطفال ، يخلص اشغالو بنفسو ، متأقلمين مع أنفسهم وعارفين الاشياء اللي تدور حولهم

2. برأيكم المكفوف يكدر يسوي شي لو ما يكدر ؟ زين اذا يكدر يسوي شي شنو الأشياء اللي يكدر يسويهن؟

يمكن ياخذ دورات تدريبيه للمكفوفين ؟

3. المكفوف برأيكم يكدر يشتغل لو لا؟ وشنو الشغلات اللي ممكن يشتغلهن؟

ممكن مُحامي او سكرتير

4. برأيكم الأعمى يكدر ياكل ويشرب ويرتب ملابسه وغراضه البقية وحده لو يحتاج أحد يسويله هالسوالف؟

إذا تدرب وتعلم وتم تدريبه يعني بشكل ممتاز اكيد بيخلص حاله

5. اذا واحد مكفوف يشتغل يكدر برأيكم يتزوج ويصير مسؤول عن بيت لو لا وليش؟

ايوه اكيد

6. شتكولون المكفوف شخص معقد منطوي على نفسه ما يحب الاختلاط بالناس لو شخص عادي لو شنو بالضبط؟
7. اذا يوم طلعت وية مكفوف وكلك (رح أدليك المكان الفلاني) برأيك رح يدبرهة ويدليك لو يتيه؟

لا بالعكس المكفوف مثقف وواعي ويملك ذكاء على فكره

8. زين المكفوف يكدر يطلع يتمشى وحده لو ميكدر وليش؟

ايوه يقدر

9. يكدر المكفوف يسوي شغلات البيت الصعبة -مثلاً ينصب مبردة أو يشد بواري ويبدل كلوبات وشمعات ويصلح المروحة و.....- لو ما يكدر وليش؟

يقدر كل شي يقدر اذا تدرب

10. المكفوف عنده عاطفة يعني هم يحب ويدور سوالف عشق ومدري شنو لو لا ؟

ليش والمكفوف ماعده قلب ! ههه امزح بس الحب فطره الله خلقها بكل انسان كان كفيف ولا مو كفيف

11. اذا يوم طلعت وية مكفوف تأمّن على نفسك؟

ايوه عادي

12. زين هالمكفوف بنظركم بس عينه ما تشتغل لو كل أعضاء جسمه خربانات بحيث يعجز ما يكدر يسوي شي؟

بس عينه .

والله يوفقك لما يحب ويرضى

[ابو ايوب..]

عليكم السلام ورحمة الله وبركاته اهلا وسهلا عزيزي المحقق.

ممكن المكفوف يسوي اشياء كثيره مثل البصير بس ممكن ان بسبب عدم الرؤيه هناك بعض الامور والمهن الي اشبه بلمستحيل على الضرير.

يكدر يشتغل اكيد بس همن مو كل شغله يعني ممكن يكون يعمل بعمل مكتبي

يكدر يرتب اغراضه بس برأي مو كل ضرير والله اعلم

يكدر يتزوج بس ممكن يواجه بصعوبه همن ممكن يصير مسؤول بس صعب يعني مو كل ضرير عنده هاي الهمه العاليه والله اعلم.

المكفوف شخص طبيعي بس ممكن عنده نوع من عدم معرفة الاشياء واعتقد بان هناك انواع متحب تختلط بلناس بس همن هذا شبه عادي لانه حتى بعض الناس اليبصرون ميحبون الاختلاط مع الناس.

مكفوف يدليني الطريق ممكن بأسماء الشوارع ممكن بس يكول روح منا ومناك فلا ما اثق بكلامه

اعتقد بعض المكفوفين يكدرون يمشون وحدهم. لكن بليابان ممكن 90% من المكفوفين يمشون وحدهم لان الشوارع بيها خطوط خاصه لهم يمشون عليها.

يصلح مروحه فيها خطوره يركب كلوبات ممكن بس بيها خطوره. افضل عدم قيام الضرير بهكذا عمل

اكيد المكفوف يحس حاله حال سائر البشر

عينه ما تشتغل وممكن بعض الاعضاء تأثرت بسبب انه ضرير و همن يتبادر الى الذهن انه غير مطلع او غير ملم بأمور الحياة بسبب انه تأثير المرض عليه.

وبلنهايه اسأل الله العضيم رب العرش العضيم ان يشفيك.

[غسان العراقي]

السلام عليكم ورحمة الله وبركاته
حسن هاي طويلة النقاط وتقريبا جوابها متشابه راح اجاوب بشكل مختصر
المكفوف انسان عادي لافرق بينه وبين من يمتلك العينان ف كل منها يرى في موضع ويعمى في موضع اخر البصر الحقيقي ليس للعينين انما للبصيره
وليشميكدر يسوي شي يكدر ياكل ويلبس ملابسة ويخرج من الدار بشرط كل شيء في مكانه ولم يتم تغيره او ان يضع احد شيء في الطريق المعتاد الذي يسلكه
ممكن يعمل المكفوف ويشتغل اي عمل اذا تدرب عليه شخصيا اعرف مكفوف يصلح مسجل كاسيت ايام الكاسيتات وراديو اي انه يعمل في مجال الالكترونيات للمكفوف قدرة خارقة على الحفظ وعدم النسيان لايمكها الذي يملك عينين لذالك كان يصلح اجهزة التسجيل والراديو عن طريق حفظ اماكن العناصر الكهربائية لكل جهاز مع معرفة قيم كل مقاومة ونوع ورقم الترانسستور وكذالك يعرف سعة كل مكثفة لكل نوع من انواع الاجهزة قدرة خارقة يتمتع بها المكفوف وهذه من تجربة عشتها وشاهدها في الواقع
في مدينتي كان هناك مكفوف يعمل بقراءة القران في الفواتح لا اذكر اسمه رحمه الله كان يحفظ القرأن عن ظهر قلب هذا الرجل رغم انه مكفوف كان متزوج ثلاث نساء وله اولاد وموجودين اولاده يحفظهم الله اذا المكفوف يستطيع ان يمارس حياته بشكل طبيعي فهو يتزوج وينجب ويعمل ليؤمن قوت عياله
اذا ياحسن المكفوف انسان ك اي انسان فقد حاسة من حواسه لكن عوضه الله بقوة البصيرة واعطاهم سبحانه وتعالى الطرفة والمعشر الجميل فلذالك مجالستهم ممتعة بصراحة
تحياتي

[Ćat]

كُل النقاط جوابها واحد وهو حسب شخص المكفوف ، إذا چان مُتمكن وصاحب ارادة أو لا ، يگدر كلشي يسوي حاله حال المُبصر إذا يكدر يستغل عقله وبقية حواسه ... إذا چان مسلوب نظر حواس ثانية كالسمع تصير عنده اقوى ، ويكدر يستغلهن حتى يعوض فقدة لحاسة البصر...
بس لفت نظري هل السؤال(المكفوف عنده عاطفة يعني هم يحب ويدور سوالف عشق ومدري شنو لو لا ؟)
حسن ، المكفوف فاقد بصره مو قلبه

[الحجي شاهين]

ماكو شي غير ممكن او مستحيل
ومثال ع ذلك
المطرب محمد الاعمى

[نـايـا]

وعليكم السلام

بصراحة بعد ما شفت لقائكم حسدتكم على هذي اﻷرادة الي ربي عطاكم اياها..واعادة النظر بحياتي يعني اني ابسط سبب خلاني اترك الدراسة بينما انتم ..تعرفون ماكو مستقبل للدراسة بالعراق بس حققتوا طموحكم ...
المكفوف حالة حال اي انسان عادي ...(يحب) ويشتغل ويمارس حياة طبيعية كاملة الله تعالى اخذ البصر لكن اعطاه البصيرة وهذه نعمة عظيمة
طبعا اني ابن خالتي فقد البصر في عمر 25 سنة تقريبا ..في البداية واجه صعوبات لكن اﻵن حياته جيدة يعمل ومتزوج
فكل انسان حياته هوه الي يسعى لها ويديرها بأرادته واصرارة مهما كانت حالته


كل الود

[مشكات]

لي عود مع اسماء مكفوفين واعمالهم وتفاصيل عن حياتهم

[ضياء المالكي]

سلام عليكم شلونكم اخوتي وخواتي؟
عليكم السلام

1. شنو نظرتكم عن المكفوف ؟
نظرتي للمكفوف نظرة أعتيادية كأي أنسان عادي لكن بعض الأحيان أكون متعاطف وياه أكثر من غيرة لانه فاقد حاسة البصر.
لكن لو كان قادر على فعل شيء لم يستطع عليه الأنسان القادر على البصر تتغير لافضل لأنه قدم مجهود مضاعف حتى وصل الى هذا

2. برأيكم المكفوف يكدر يسوي شي لو ما يكدر ؟ زين اذا يكدر يسوي شي شنو الأشياء اللي يكدر يسويهن؟
يبقى الأنسان المكفوف هو ونشاطه وهمته وقدرته لأنه عندما الله سبحانه وتعالى فقد منه البصر أعطاه أشياء أخرى كالذكاء مثلاً

3. المكفوف برأيكم يكدر يشتغل لو لا؟ وشنو الشغلات اللي ممكن يشتغلهن؟
ممكن يشتغل أني اعرف شخص أعمى بالمنطقة بس مدرس أنكليزي وياخذ درورس خصوصي وللعلم أنه
ماداخل كلية فقط أتعلمها من الاعدادية ومدرس متمكن جداً وهو كفيف .

4. برأيكم الأعمى يكدر ياكل ويشرب ويرتب ملابسه وغراضه البقية وحده لو يحتاج أحد يسويله هالسوالف؟
يكدر طبعاً لكن لو كان برفقته شخص أخر يكون قلل العبىء عليه

5. اذا واحد مكفوف يشتغل يكدر برأيكم يتزوج ويصير مسؤول عن بيت لو لا وليش؟
أكيد لأنه النظر لايعيق هذه االاشياء وربما يبدع في بعض الاحيان

6. شتكولون المكفوف شخص معقد منطوي على نفسه ما يحب الاختلاط بالناس لو شخص عادي لو شنو بالضبط؟
هذه تعتمد على نفسية الانسان وتتغير من شخص الى أخر كبعض الناس المبصرين تراهم متغيري المزاج

7. اذا يوم طلعت وية مكفوف وكلك (رح أدليك المكان الفلاني) برأيك رح يدبرهة ويدليك لو يتيه؟
لا راح يدليني لأنه اتكلم عن تجربة مع شخص من الاقارب أخذني لمكان معين وانا أكله انت جذاب تشوف هههه

8. زين المكفوف يكدر يطلع يتمشى وحده لو ميكدر وليش؟
يكدر طبعاً لو كان الطريق الذي يمشي عليه سالكه سابقاً

9. يكدر المكفوف يسوي شغلات البيت الصعبة -مثلاً ينصب مبردة أو يشد بواري ويبدل كلوبات وشمعات ويصلح المروحة و.....- لو ما يكدر وليش؟
الله وكيلك ياخوي اني لسه ماعرف اشد المروحه بس الكلوب مرات ابدله هههههه
لذلك هذا يعتمد على نباهة الانسان نفسه وليس المكفوف حصراً .

10. المكفوف عنده عاطفة يعني هم يحب ويدور سوالف عشق ومدري شنو لو لا ؟
الاخت كات ذكرت كلمة حلوه أنه أنت فاقد بصر وليس فاقد قلب والحب والعاطفة في القلب

11. اذا يوم طلعت وية مكفوف تأمّن على نفسك؟
ربما اذا كان الطريق سالكه سابقاً ..

12. زين هالمكفوف بنظركم بس عينه ما تشتغل لو كل أعضاء جسمه خربانات بحيث يعجز ما يكدر يسوي شي؟
لا بس عينه مايشوف بيها وأعتقد الله سبحانه وتعالى عوضه بأشياء مميزة بحيث الشخص المبصر لم يستطع عليها

شكراً الكم مقدماً سامحوني على الاطالة وكثرة الأسئلة.
حياك الله أستاذنا العزيز ..

في النهاية أستاذ حسن أنت رمز ونموذج يقتدى به الأشخاص المبصرين فضلاً عن فاقدي البصر
ربي يوفقك ياطيب