أخاف يموت گلبي
ومايصح ملگه
وأخاف يطول عمري وكل شي ماإلگه
حاير
والوكت حيرني حيل أهواي
لاولف اليمرني
وأحضه بالشبگه
ولاآخر نفس والموت بالشهگه
غريب وجبت عمري
أتگلب إعله النار
ردت أحباب گلبي وطالت الفرگه
وبيه المادرو لاموني عل دمعات
مايدرون عيني والچفن منطبگه
وأنه شايل گلب نيران
تسعر بيه
شيبرده الگلب
متروس بس حرگه
وشيبرده النفس
استلذ طعم الآه
من راحو أحبابه وضاع كل حگه
ياديرة هلي؟؟
وطيب ومحنه وشوگ
ماظلي گلب أغيابكم شگه
قفل وكتي علي بيبانه وأنتو أبعيد
ردت بس باب واحد
يصح ممسرگه
وأنه أبنادم
عشت بالغربه صار أسنين
خضر وجع گلبي وسكن كل دگه
وبعدكم ياهلي؟؟
ناسي الفرح فدنوب
بيه أهموم كومه وماتمر ضحكه
وصرت مثل الشجر مرت عليه الريح
هزني ومن طحت ورگه ابأثر ورگه
الشاعر عباس الربيعي
رد مع اقتباس
