كنت دائما أرى أن والدي رجال كشخة مقارنة ببقية الرجال المقبلين على بحر السبعين,حريص على نظافته الشخصية ولبسه ومظهره وإنتقائي في بقية أموره الشخصية ولو ترجّه يمين يسار طاح منه سّطل دهن عود , رجل حريص على نظافة البيئة المحيطة حوله بدرجة صارمة , يعني ممكن يجي لي أنا كف يمشي مليون إذا شيئا ما سقط مني مثلاً, وكذلك والدي أثناء وقت الفراغ اذا فقدناه نجده في الحديقة يلحسّها وينظفها تقول ملك الأردن مرسل له مسج يقول أنه يريد يزوره بعد شوي , راحت السنون ومشت الحياة حتى قدّر الله قبل كم يوم أصر صديق على أن أزوره في شقته المتواضعه كما يقول في أحد أرقى الاحياء هنا.
الولد هذا صديقي ما أعرف بالضبط امه وابوه وش الورد الي قرأوه ذيك الليلة عندما التقى الجمعان والا ماء الورد الي غسلوا فيه , وإلا بالضبط وش نوع الزبادي الي يآكلونه , ولد صارخ الوسامة , لايشبهنا أبداً , مافيه كذا فلقات بالرأس ولا جروح ظاهره بالوجه ولا شيء , وكذا بشرته نقيّة تحس أنه يصحى والزبادي والخيار على وجنتيه ويصحونه اهله على موسيقى كلاسيكية , والا لبسه يالله من فضلك , اخطط انا بعد اربعين سنه اني البس مثله طبعا.
دخلنا ذيك الشقه المتواضعة على كلامه, ذاك السجاد الي اتوقع ان شاه ايران اهداهم اياهم, والا التحف والأثاث , واللوحات....كان أصدقائي دائما يقولون اني مبذر على موقع شقتي او مبلغ إيجارها او على طريقتي في تأثيثها , يوم شفت شقة الرجال قلت ياخي الله يلعن وجيه الفقر اصدقائي الي أنا أعرفهم , ناس فقرانه فعلا , , حتى يوم جلسنا بشقته كذا وجلس وحط رجل على رجل مو مثل رجل على رجل حقتنا , باين انها رجل على رجل محترمة جدا , مهو ابو كلب حقتنا .
كلله كان كوم ويوم جلس يفرجيني صور عائلتهم وكذا , بدأنا بصور والديه في شهر العسل , أبوه تقريبا بعمر والدي , يعني نفس الحقبه الزمنيه الله لايعيدها , شهر العسل كان في عدة دول ومن الروقان بعض تنقلاتهم كانت على ظهر باخرة , شيء في امريكا وشيء في اثينا , وشيء في كندا وحنا أبوونا يجلس عشرين سنه يمن على زوجته على ذيك العمرة الي أخذوها , بالصور أبوه ذاك الرجال المربوع الطويل والشنب الكث والحواجب اللي تقول انها يوم السبت من عرضها وكثافتها , والا امه لبس قمة الكشخة والأناقة ودامهم بشهر العسل لاحجاب ولا بطيخ , خل الصورة تتكلم , وحنا الواحد يتزوج له وحده عصلا كويحة ثم يبلشها تغطّي تغطّي , ياخي خلها كاشفه أحسن وإعتبرها إعلان عن الفقر في الصومال اجل لو شاف أم صديقي بشبابها وش بيقول نعنبو بليس هذي الي المفروض والله يحطونها معرض فنّي , استغفروالله مابي اتكلم بام صديقي, بس صراحة جمال خارق للطبيعة , وحتى احس اني شميت عطرها بصورة عمرها اكثر من 35 سنه يمكن..يعني لو كنت قاضي كان قلت ذالنوع من الحريم ودك تستنسخهم استنساخ مو تخليهم يحملون تسع شهور وولادة وخرابيط .
وتنقلنا بين عدة صور , ووصلنا صور لأمه في طفولتها ,حتى صور أمه كذا وهي كبيرة شيء فاخر جدا ,ذاك الشعر , والا ذيك النظارة كذا الي تشبه نظارة عزيزة جلال في أغنية مستنياك ( ابحثها باليوتيوب) وذاك اللبس الفاخر , الله يرحم الحال ياخالتي منيّرة , من الله خلق الدنيا وعرفتها في الحياة وشعرها هو شعرها , شوي يمين وشوي يسار وبينهم تقول طريق مشاة , تكفين ياخاله غيري ذا اللوك حقك يرحم أهلك , والي يقهر توفي زوجها وهي فوق الخمسين وبين فترة والثانية تقول جاني واحد يخطبني بس مقدر اخلي عيالي
انتقلنا الآن الى صور صديقي بطفولته , ياعيب الشوم والله ولا وجه مقارنة ابداً , الولد قررت امه انه يولد في بيروت, وجه العالم الشرقي في تلك الفترة , وانا مولود ماني قايل الله يخلف علينا , والدراسة شوي كان في لبنان شوي انتقل مدارس داخلية في بريطانيا وصوره كلها في حدائق وأماكن راقية وانا اعز صورة عندي لما رحت لأولى ابتدائي , صورة كذا تحسني معصب وشايل الدنيا على رآسي , لا وأنا ياولد البطة السوداء كنت ألعب حواري ترابية واذا زعلوا علي خلوني أجيب الكورة إذا احد شاتها بعيد والا طاحت ببيت أحد من الجيران , واذا جبتها عشر مرات يحق لي اللعب من بكره , بس ولو أحسن من صديقي الي كانوا يرفضون يلعب ابداً واذا زعل جاله حاله نفسية يقعد يبكي ويآكل تراب ههههههههه الله يخرب بيتك ياعزيّز وهسه هو طبيب أسنان قد الدنيا , يابو تراااااب هههههههه , صاحبنا درس الثانوية مدري وين قال بس شيء عظيم وانا يوم كشخت بالثانوية رحت لثانوية النجاشي بعد الحاح على والدي واضراب تام عن الدراسة , لا وبعد بواسطة انتقلت لها ههههههههههههه خف علينا يامدارس الأمراء
ايه وين وصلنا: السعادة تنبض من الداخل اجل ( ولقمة هنيّة تكفي ميّة)
رد مع اقتباس
المشاركة الأصلية كتبت بواسطة المبجله
