تعّبني ليل مناطَرَك
يسألني گلبي إشأخّرك
و يلگى الجواب بدمعتي
المحتارة فوگ خدودي
اميال ساعة موعِدَك
ثگلن و انا المترصِّدَك
ابسندانة آمالي اشكثر
ذبلَن عليك ورودي
طرّز عمُر روحي الأمل
تحسب بدت ساعاتك
و اتصلت برابط عشگ
ذاتي الحزينة و ذاتك
گلبي وية گلبك متِّحـِد
رغْم الهجر رغم البعد
عيون اليحبّك تستعِـد
كل جمعة تحسب شوفَك
لوما أمل عدها و صبر
ما تحتمل هذا الهجر
يا أحلى من وجه الفجر
لمَّن تمُر اطيوفك
دگينا بچفوف الأمل
يلمهدي باب احسانك
دلّينا نوصل لك عشگ
يبن الحسن عنوانك
،،،،،،،،،،،،،،،،،،،،،
كل عين ترقب شوفِتَك
كل اذن تنطر صيحتك
كل الحواس ابغيبتك
منتظرة بس ابشارة
عن كل عشِگ صام المُحِب
و هلال وجهك يرتِقِب
يمته ابسما الحُب و الأمل
وجهك تشع انواره
يا مهدي تدري بغيبتك
غاب الجمال وياها
كل بهجة دونك من غبت
تدري انفقَد معناها
نكتب رسايلنا و نِحِن
ذكرى اعلة حيطان الحزن
طرّز شوارعها المدِن
يا مهدي حزن غيابك
انعكست ابوجه الزمن
حيرة غيابك و المِحَن
يلغايب انت ابيا وطن
رد بالفرح لحبابك
رسمَت ملامِح غيبتك
دمعات الـ يحبّونَك
كل دمعة تكتب عالوجن
شنهو العمر من دونك
،،،،،،،،،،،،،،،،،،،
ودّينا بَنسٌام الهـوا
حسراتنا و راحن سُوا
گلبك يحس بينا اشكثر
و اشگد يحن لحبابه
دنيانا من دونك عدم
صرْح الصبر بينا انهدم
تدري الغياب اشگ صعب
ناره اشكثر لهّابة
هاك استمع نبض الگلب
كل نبضة تصرخ وينك
و ندري إبصُوَر هَمْ شيعتَك
مرسومة كلها بعينك
بكل عين إلك دمعة عتب
تسأل يمهدينا اشعجب
طوّل غيابك و انّـَهَـب
هذا العمر و ايّامه
ترجع يـَ وجه الله اشوكِت
و تمسح دمع همنا الـ يكِت
لو بالغياب اتمسّكت
كل شيعي ينسى احلامه
رد بينا كل لحظة فرح
كل بسمة فارگناها
دمعاتنا ابدربك ورد
لمّن تِـرِد تلگاها
الشاعر مرتضى الشمري
رد مع اقتباس
المشاركة الأصلية كتبت بواسطة العراقيـة العبيـديـة
