هنا

[نصرالدين البلداوي]

السلام عليكم
شلونكم
موضوع لطيف عن المراهم والكريمات العراقية مال معمل سامراء في الصيدليات

1- #البتنوسام :- بي اربع انواع والي هن بتنوسام كريم وبتنوسام دهن وبتنوسام G وبتنوسام N , وطبعا البتنوسام بشكل عام يحتوي على مادة ال #betamethasone والي هي من مجموعة الكورتيزونات .. يستعملوه بالحساسيه مال جلد والحكه وهالأمور هاي وبالنسبة للكريم فيحطوه على الوجه اما الدهن فيخلوه على الجسم .. وطبعاً ميصير يحطوه على جرح مفتوح لان كل الكورتيزونات ممنوع يخلوها على جرح مفتوح .. وبالنسبه للبتنوسام G فهو يحتوي على مادتين والي هن betamethasone + gentamicin اما البتنوسام N فهو يحتوي ايضا على مادتين والي هن betamethasone + neomycin وهذني طبعاً الاضافات ثننيهم هن مضادات حيوية من مجموعة ال #aminoglycosides تفيدنا في محاربة البكتريا وحالات الإلتهاب المصاحبة للتحسس .. سعرها الف دينار بأنواعها ..

2- #الفيوجيدين :- عصارة برتقالية تحتوي على مادة ال #clotrimazole وتعتبر هاي المادة مضادة للفطريات ينطوها بحالات الاصابات الفطرية الجلدية وبين الأصابع وايضا بالتحاضير الصيدلانية .. وهي بيها نوع واحد فقط مابيها انواع اخرى .. سعرها الف دينار ..

3- #الدرمودين :- عصارة جوزية وخضرة ,, والي هن كريم ودهن يحتوون على مادة ال #clobetasol وهي ايضا من مجموعة الكورتيزونات ينطوها في حالة الصدفية والاكزيما حسب استشارة الطبيب الاختصاص .. واكيد هذا الكريم ميصير يخلوه على جرح مفتوح مثل البتنوسام .. سعرها الف دينار ..

4- #النستاكورت :- ايضا متوفر منه كريم ودهن وهو عصاره صفرة كلش حلوه مكوناتها يحتوي على 4 مكونات والي هن gentamicin + neomycin وهذني شرحت عنهم ليفوك وكلت هذني مضادات حيوية , ويحتوي ايضا على مادة ال nystatin وهاي المادة مضادة للفطريات Anti Fungal واخر شي مادة ال #triamcinolone وهي مادة من مجموعة الكورتيزونات ايضا .. يعني هذا الكريم يشتغل على الفطريات والتحسس والالتهابات الجلدية .. وايضا ينطوه بحالات الالتهابات النسائية الداخلية .. واكيد هذا الكريم ميصير يخلوه على جرح مفتوح ايضا مثل البتنوسام والدرمودين .. سعرها الف ونص دينار ..

5- #هايدروكورتيزون كريم :- بي نوعين ابو ال 1% وابو ال 2.5% ام الواحد بالمية لونها وردي بينما ام ال 2.5% يصير لونها تقريبا عنابي بلون العنب .. وثنينهم يحتوون على نفس المادة والي هي الهايدروكورتيزون لكن بتراكيز مختلفه حسب الحاله .. واكيد ينطوهن بحالات التحسس الجلدي .. واكيد ميصير يخلوها على جرح مفتوح .. سعرها الفين دينار ..

6- #جينيدين كريم :- يحتوي على مادة ال #gentamicin يستعلموه في حالات الالتهابات الجلدية ولون العصارة ايضا عنابي بلون العنب مثل الهايدروكورتيزون ام ال 2.5% .. سعرها الف دينار ..

7- #مايكودين دهن :- موجود منها هاي العصاره فقط دهن ماكو منها كريم وتحتوي على مادة ال #nystatin يعني يستعملوها كمضاد فطري حسب الحاله مال مريض ولون العصارة اصفر فاتح مو مثل النستاكورت اصفر طوخ .. سعرها الف دينار ..

8- مرهم #ليدوكائين :- موجود منه فقط مرهم يحتوي على مادة ال #lidocaine بتركيز 5% ويستعملوه كمخدر موضعي ينطوه في حالات الاصابه بألم وماشابة , وميصير يخلوه على جرح مفتوح اطلاقاً لان كلششش يأذي القلب اذا دخل للدم واحتمال يسوي #shock ولون العصاره سمائي فاتح .. سعرها الف دينار ..

9- كريم #درموكال :- عبارة عن عصاره لونها احمر تقريبا ,, ينطوها في حالات التحسس الجلدي واكثر شي لحالات لسعات البق والنحل وينمتي لمجموعة مضادات الحكه #Antipruritic ,, تحتوي على ثلاثة مواد والي هن glycerin + calamine + camphor وهذني المواد نفسهن موجودات بالكالامين لوشن .. سعرها الف دينار ..

10- #الزنك اوكاسيد والزنك #كاستر :- بالنسبة للزنك اوكاسيد عبارة عن مرهم لونه العصارة مالته اخضر ينطوه في حالات حب الشباب والطفح الجلدي اما بالنسبة للزنك كاستر فهاي العصاره لونها ازرق فاتح تحتوي على مادتين والي هن زيت الخروع castor oil + مادة الزنك اوكسايد .. اكثر شي ينطوها لحالات الطفح الجلدي عند الاطفال في منطقة الحفاض .. سعرها الف دينار ..

11- مرهم #رومالجين :- عبارة عن عصارة لونها نفطي بلون النفط ينطوها في حالات التشنجات والاصابات العضلية لان هو مرهم #حراري , يحتوي على عدة مواد وهي methyl salicylate + camphor + menthol + menthol oil + turpentine oil وغيرها من المكونات الأخرى مدتحضرني حالياً .. سعرها الف دينار ..

12- كريم #سيلافكس :- عباره عن كريم مطهر ينطوه في حالات الجروح والخدوش والحروق يحتوي على مادة واحدة وهي #cetrimide ولون العصاره ابيض ومكتوب عليها بالوردي .
.
اما الاســـعار ....تباع في الصيدليات ب 1000 دينار
.

[ابوعلي/]

شكرا جزيلا لك

[هــاجــر]

ههه انت شتحجي شتكول.. جماعتنه هنا.. هي لكريمات يخلوهن ع وجوهم..

يكولون درمودين ..يبيض الوجه .ويطلع الحواجب

بس الزنك كلش زين.. اخوي احترك وجهه من حرارة الحيم.. صدفه.. وخليتله زنك.. كعد الصبح وجهه كيمر

شكرا ع التقرير نصر..

[سعد العراقي راقي*]

تسلم دكتور
طبعا من زمان واكو سؤال عندي ياريت تخصصله موضوع باعتبارك من ذوي الاختصاص
اكو اطباء ويانه بالمستشفيات دائما يركزون على ادوية معمل سامرا لانه يعتمد على قانون علاجي متطور من حيث القيمة العلاجية
مااعرف شنو الاختلاف بالقوانين العلاجية الانكليزي والالماني وغيرهن
شكرا جزيلا لك

[هيثم الغراوي]

راقي الموضوع

[نصرالدين البلداوي]

شكرا جزيلا لك

العفوو نورت وردة

راقي الموضوع

الله يسلمك

[نصرالدين البلداوي]

ههه انت شتحجي شتكول.. جماعتنه هنا.. هي لكريمات يخلوهن ع وجوهم..

يكولون درمودين ..يبيض الوجه .ويطلع الحواجب

بس الزنك كلش زين.. اخوي احترك وجهه من حرارة الحيم.. صدفه.. وخليتله زنك.. كعد الصبح وجهه كيمر

شكرا ع التقرير نصر..

هههع
اني الحمد لله ما احط ولا شيء
ابيض من أصلي بس الشمس حركتني
اضوج احط من هاي الشغلات مال كريمات ودهونات
العفوو نوورتي

[نصرالدين البلداوي]

تسلم دكتور
طبعا من زمان واكو سؤال عندي ياريت تخصصله موضوع باعتبارك من ذوي الاختصاص
اكو اطباء ويانه بالمستشفيات دائما يركزون على ادوية معمل سامرا لانه يعتمد على قانون علاجي متطور من حيث القيمة العلاجية
مااعرف شنو الاختلاف بالقوانين العلاجية الانكليزي والالماني وغيرهن
شكرا جزيلا لك

العفوو غلاي
اي من عيوني أن شاء الله اسوي الموضوع الي تريده

[عمو ساكه]

[أم نرجس]

شكرا جزيلا