هنا

[CaSpEr]

توضيح فقط

حسب ما أفتهمت من الشرح هو ان 75% ( او أكثر )من الشعب ينتمي للأحزاب و هكذا يكون 25% فقط من لا ينتمون
وهسه انت تدعوا هذا النسبة القليلة الى ان يكونوا أحزاب أخرى

يعني الشعب صار بالإجماع منتمي لحزب وكل شخص ينتخب حزبه


شكراً للمجهود

[Samer]

السلام عليكم .. وشكرا الكم على المرور


اني ما ادعو إلى انشاء احزاب جديدة بصبغة طائفية .. كل (او 99%) من الاحزاب اعلاه .. ناتجة عن كونها تتبع ايديولوجية هدامة (دينية او عرقية او مناطقية) .. كل حزب يفكر يصعد مو لغرض خدمة العراق .. بس لغرض الحصول على جزء من الـ "كعكة"

نحتاج حزب جديد .. يتبنى التوجه المدني .. المدنيين شنو يريدون ؟ يريدون نظام حكم يطبق "حلول جذرية" للمشكلات اللي تواجه العراق المدنيين تايهين تماما .. كل واحد يسولف وحده حاليا .. نحتاج حزب يقوده شخص مدني .. لا اسلامي ولا طائفي ولا عرقي ولا عشائري ولا مناطقي .. همه هو تغيير النظام بالكامل وتحويله إلى نظام متقدم يشبه الانظمة بالدول المتقدمة .. يتبنى فد برنامج انتخابي يشبه هذا

للمعلومات .. العراقيين حاليا معظمهم ما منتمين لاحزاب .. يعني هسة هذه الاحزاب اللي عددها 71 لو تضربها في عدد افراد لكل حزب نكول 3000 يصير المجموع حوالي 200 الف .. من اصل 35 مليون ما الهم علاقة بالاحزاب لا من قريب ولا من بعيد .. مجرد كل مرة يجي واحد يضحك عليهم بحجة (الدين والعرق والمنطقة) .. يكللهم اذا صعدت اعينكم .. انطيكم قطع اراضي .. ابلطلكم الشوارع مال القرية .. اسويلكم استفتاء للانفصال .. هيجي شي

الـ 25% المدنيين .. ما يفكر يصعد سياسي علمود يعينه .. ولا يبلطله شارع، ولا علمود يدعم طائفة .. ..هو يفهم شنو الموضوع .. يريد سياسي يصعد علمود يقتلع هذه الهوسة كلها من الاساس .. و يقلب نظام الحكم إلى رئاسي و يتيح الحريات ويحول العراق إلى بلد متقدم ويفتح البلد للاستثمار ..و يحاسب (او عل اقل يكف ايد) الفاسدين .. بحيث كل اجراء يكون بهدف مصلحة البلد ورفاهية المواطن .. مو لاهداف طائفية او مصالح فئوية ضيقة

عل عموم وفق حساباتي .. راح يجربون الناس (لمدة اربع سنوات) قوائم الحشد.. ممكن 100 مقعد لاحزاب الحشد .. و قسم لحنان الفتلاوي واقسام قليلة للوجوه السابقة نفسها .. و حوالي 100 مقعد متفرقة للاقليات والاسماء اللي ما سامعين بيها (هي نفسها الـ 100 مقعد اللي ما سامعين بيهم هسة، لا يحجون، ولا يحضرون، ولا الهم علاقة بالموضوع)، .. بس اني عندي امل انه يصعدون فد 20 للتحالف المدني الديمقراطي (فائق الشيخ علي) .. اللي هو اقرب شي (من الموجودين) لتطلعات المدنيين (يعن يخللي نكول يقترب 5% من تطلعاتهم)

بس اذا صعد هسة حزب مدني حقيقي .. يقوده شخصية او مجموعة شخصيات مدنية معروفة جديدة عل ساحة الانتخابية .. ويدعو ببرنامجه للتغيير الجذري (مثل تغيير نظام الحكم إلى رئاسي وتغيير الدستور وتنفيذ كل الاشياء اللي نحلم بيها من اهمها سحق الطائفية والعشائرية والمناطقية والعرقية) .. وسويناله دعاية بالفيس بوك و بدرر العراق وبكل مكان .. فاكو احتمال المعادلة تتغير إلى حد كبير .