امي انولدت ب ١٩٧٧.٦.٢٤
حياتها بالبدايه جانت عادية ...
الى ان صار عمرها ٤ سنوات ، توفى والدها (الله يرحمه) وبدت كل الامور تتغير على هالطفلة ،
صارو يعاملوها كشخص عمره اربعين سنة من ناحية تحمل المسؤوليات وكل الاشياء ، بس رغم كلشي هي علمت نفسها القراءة والكتابة قبل ال٦ سنوات ، طبعا طول الفتره جانت متفوقة جدا رغم الظروف الصعبة وعدم الاهتمام اللي جانت بي والتفرقه بين الولد والبنيه بعائلتها ، استمرت بقراءة الكتب وجانت كاتبه ورسامه وخياطه بنفس الوقت الى ان صار عمرها ١٩ وكانت هذي سنه دخولها الجامعه بس انجبرت تترك دراستها علمود الزواج لانه بنظر عائلتها انه ميصير البنيه تدرس بجامعه ويه اولاد والزواج افضل بالنسبه الها ، وطبعا كـ أغلب العوائل العراقيه الفاشله ام الزوج واخواته معاملتهم سيئة جداً ، بعد مرور سنه اجيت اني للدنيا سنة ١٩٩٨ ، طبعا جنت الطفلة الاكثر تميز بين كل الاطفال وجنت جريئة وقوية ومرحة وذكية واهم من هذا كله جنت البس احلى الملابس بزمن جان صعب يحصلونها و الفضل لامي لانه جانت تخيطهم الي بإيدها الناعمة الحلوة ، ولحد الان اتذكر من جانت تمشط شعري بكل حنية ونغني اني وياها "انت احب الناس الي" ...بعدها جابت اختي واخوية ، وطول هالفتره چنه الاطفال المميزين حتى بطريقه الكلام ، و نمتلك جمال ملائكي مثل ماما ،
بعدها ....
سنه ٢٠١٣ جابت اخويه الصغير و تمرضت ، صار عدها ضمور بالغدة النخامية و كل الاعضاء اللي هذي الغده مسؤولة عنهن ميشتغلن بالشكل الصحيح ف لازم تاخذ ادويه تقوم بعملها طبعا الادويه للابد بس هذي الادويه الها اعراض جانبيه منها هشاشه العظام والسمنه وهيج اشياء ،
وهي دا تكافح المرض ودا تكافح كول شي ولاتزال تكافح المعامله القاسيه اللي مرت بيها .... وقريبا حتفتح مشروع الخياطه الخاص بيها "للعلم ملابسي اللي البسها والكل يتعجب عليها هي كولها من خياطها ...
اليوم اني عمري ١٩ سنه بنفس عمر ماما من جانت حامل بيه ،
ماما اريد اكولج انه اي شخصية بهذا العالم مهما كان اللي قدمته متوصل الج ابدا ... انتي اعظم انسان لازم مجتمعنا الغبي يقدر وجود اشخاص مثلج ، انتي بطلة ، انتي قدوة ، احس انه لازم العالم بالعراق يعرف بوجودج يعرف بكفاحج ويعرف بقوتج ويعرفج انتي ، مو تالي يجي واحد يستهزأ بالمرأة بكل بساطة.! #حوراء
منقول
رد مع اقتباس
المشاركة الأصلية كتبت بواسطة سورين
