هنا

[عامر رشيد]

علي تضحك يخايب وانه علو الغيم ..
عله ادموع الفرح هم تضحك النكته ..
يبو جناح الشمع متعلي وين اتريد ..
تدگ باب الشمس چنك غشيم انته ..

[عامر رشيد]

ويبو أسنون الخشب لا تعض چف النار ..
طفو أسنين الخشب لو هفته وكته ..
ويبو زنود الرمل لتلاوي زند السيل ..
وعناگيد الصخرگبلك غدن تحته ..

[عامر رشيد]

عله الماي الضحل يتونس التمساح ..
ويفرح بالوحل لمن يمد خشته ..
وعله موت الشمس يتنومس الخفاش ..
وعله الهندس اهدومه عيب ماخذته ..

[عامر رشيد]

طميع الاخطبوط وعنده ميت اذراع ..
لچن وكت المزامط ماله جفلته ..
المبرد صح خشن وناعمه أخدود السيف ..
لچن ياهو الرگاب انشكلت أبذمته ..

[عامر رشيد]

يبو درزن وجوه استهلكن بالسوم ..
وعله باب الخجل اخر وجه عفته ..
بعد مالك أعيون وتنكسر باللوم ..
ولا عندك وجه حته أتعرگ گصته ..

[عامر رشيد]

صحيح انته ضخم بس مو ضخامة روح ..
ضخامة كركدن بلوه ابتله أبجثته ..
الگمگم صح چبير ودلته لاذت بيه ..
لچن غصبن يدنگ راسه للدلته ..

[عامر رشيد]

وصحيح السيسبان أيلوذ بيه الياس ..
لچن ياهو صواني العرس عازمته ..
وصحيح الأثل عالي وفيه فوگ التين ..
لچن ياهو الچفوف أتوسلت سلته ..

[عامر رشيد]

وصحيح الجوري نام أبمنة الصفصاف ..
لچن ياهو الخشوم أتعنت الشمته ..
دخان المزابل يطم عين الكون ..
لچن عود البخور الحلفوا ابخته ..

[عامر رشيد]

ود العامري ارهه من ابو الحسنين ..
لچن ياهو اليلوذ المذنب أبگبتة ..
وياهو اللي ضربته أتعادل الصوبين ..
وياهو العل صراط اليعبر أبذمته ..

[عامر رشيد]

الفراش أيطير مفرد والجراد اسراب ..
لچن ياهوالحدايق تحتفي أبلمتة ..
فوگ أمن الخشم متعلي عرش العين ..
لچن تصرخ دمع لو سمعت أبطگته ..