حبيتك ضعف حب يوسف ليعقوب
وعلى حبك يروحي شكثر لاموني
اذا يعقوب اعمه وبلقميص ايطيب
انه من اسمع اسمك ترجع اعيوني
حبيتك ضعف حب يوسف ليعقوب
وعلى حبك يروحي شكثر لاموني
اذا يعقوب اعمه وبلقميص ايطيب
انه من اسمع اسمك ترجع اعيوني
خِلّك ما صرت لوما خليلي أتصير ..
وصرت خِلّي برضاتك چي صرت خِلّك ..
علّمتك عليّه من الألف للياء ..
وتغلط بالاجابه وآنه أعدّلّك ..
حرثت الخاطرك بالروح حرث الگاع ..
بوسات أو ورد كل خلگي أشتلّك ..
شمعة انته بحياتي و عمري ظلمة ليل ..
اشعلت روحي و خفت ماشعلك .. أشعلك ..
خاف أسنين عمرك تحترگ بالشوگ ..
أضمّلك گمت من عمري اعزلّك ..
عليك اتسودنت مو بس أخاف اعليك ..
احل روحي و اكضّك خايف تحلّك ..
و اغمض من أشوفك و اخدر اعله الصوت ..
غلطه انته أبحياتي و صعبه ما ازلّك ..
چم إبليس اطرد من يوزني اعليك ..
و چم شيطان ارجمه أبروحي و اكتلّك ..
ما صيرن نبي بس راهب آنه اوياك ..
بآيات ألمحبه أبشوگ ارتّلّك ..
شلّي بغيرك انته و ألگه مثلك وين ..
و تتعب تلگه غيري بهلتعب شلّك ..
ياهو ألعلمك و اتريد تمشي أبعيد ..
سلّ الشوگ خايف باچر ايسلّك ..
مثل ظلّك جنت بالخطوه نمشي اثنين ..
و مشيت انته بظلام و ضيّعت ظلّك ..
دلّيني عليك أسنين تايه بيك ..
و امشي اوياي ادورك خاطر أندلك ..
عرّفني اعله شخصك رايد احچي اوياك ..
بس كلمه و بعد ما غيرهه انگلك ..
وحده أمن الثنين أو وحده راح اختار ..
لو كلّك أحبّك لو أحب كلّك ..
اسأل ليش احبك حته اگلك ليش ..
وليش شما تسوّي أوياي أقبلّك ..
