أزعل يا وطن وارجع اراضيك
وحن بغربتي لناسك واراضيك
بغير الفرح صدك ما ارى ضيك
واذا ًَمََرك حزن احسه بيه
قيمة البشر مو فلوس وسيارة ........... وعمارة
البشر للموت يمشي شما طالت ........... عمارة
مدرسة غيرة وزلــــــــم ارض ............ العمارة
للحگ فزعو فرد فزعة وكلهم ناصرينة
عونك ياعراق الخير والطيب
وبترابك نداوي العلل واطيب
وتجيك الناس مدري منين واطيب
وجابولك الفتنه الطائفيه
گبل چانت الخوة تراد ياخوي شعجب هسه الخوي ينكر خويه
گبل چنت باب المراد أدعيلك ترجعلي بسلامه وبيدك تحني چفوف اديه
ليش الناس تاكل بعضها وما كو انصاف وليش يا خوي گطعت بيه
بشريعة غاب صرنة والله الستار قوينه على الضعيف يسوي وليه
ترا تاهت والفرج عالباب شلون افتحله ومكطوعات اديه
اريدك عون ياخوي مو فرعون شو طلعت ابليس ولعبت بيه
ردتك درع دوم على صدري تصد سهام عدواني الرديه
مو انته الزامطت وكلت انه خوك انه بالشده وانته تتفرج عليه
ناشدت كل الناس لحگوني وگعت محد مد ايده وضمد جروحي النديه
صرت انه يوسف وبير ملگوح خوته الباعته بسعر مزهريه
لك بعظامي تنهش وانه خوك ماغرت من غراب يدفن خويه
طلعت انته صفر عالشمال وغيره ما عندك ميه بالميه
ناذر للوطن عمري وآنه الممنون@
وأبيع الروح بأرخص لو نزل سوكه@
طابوكه اشتريت وماخذت دبدوب@
خفت يوم الوطن يحتاج طابوكه@
في الفترة البغيضة التي مرت بها عاصمتنا الحبيبة بغداد ( فترة القتل على الهوية ) كتب الشاعر جبار رشيد هذه الومضة :
الناس تخاف ماتحمل هويات
الهوية بجيبهم صارت منية
ذبوها المنية وطلعوا الناس
لكوهم جثث مجهولة الهوية
وفي هذه الومضة للشاعر صباح الهلالي كان يتحدث عن عدة حكومات حكمت العراق فكتب :
هذولة من طغوا , صحنة لهذولاك
أجوا عالصوت فوراً وانتخولة
واجت نفس الوجوه وذولة ذولاك
نصيح المن ونخلص من هذولة
وعن حال الناس كتب الشاعر نائل المظفر :
ثق لو بالعراق يصير طوفان
ونبي الله نوح يرد علينا
يباوع بالبشر , مايلكة انسان
ويركب وحّدة وتمشي السفينة
وهذه الومضة للشاعر يحيى العلاق :
دمك نفس دمي وثبت بالتحليل
وجذب لاانت اخوي ولا ابن عمي
صرت نفس الفصيلة وياي تعرف ليش ؟؟؟
لان خلصت عمرك تشرب بدمي
وللشاعر ميثاق الهلالي :
أجرنة الاعشاش من العصافير
خاف من الرصاص بيوتنة تطير
وطاح العش كبل الحياطين
فكر عمّينة حتى اعلى العصافير
انا الشراي للخوه بلا كم
اوابد ما يسوى كل عمري بلا كم
اذا مره نزل لينه بلاكم
مثل الجنه ونفتحت عليه
زماني بسيف مت عني علي راد
وهمي اشماجفل عني علي راد
ادور الي يجاوبني علي راد
ويضمد اجروح ما الهن شفيه
