مساء الخير على كل الدرر ...
اليوم حبيت اشاركم وحده من الامور المهمه واللي عاده ما نتهاون بيهه وهي الفحص الدوري ....
طبعا الغايه من هذه الفحوصات هي حتى نكتشف احتماليه حصول المرض بالتالي نتخذ الاجراءات اللازمه بمنعه .. او في حال بادي المرض لكن بشكل بسيط بحيث ما يحس بي الشخص رح تكون غايته انو نعالجه بصوره صحيحه ونمنع مضاعفاته ..
هناك قاعده تكول كلما اكتشف المرض ببدايته كلما زادت فرص علاجه وتنوعت الخيارات المطروحه لهالشي .. هاي فقط كمقدمه بسيطه هسه خل نجي لطبيعه الفحوصات اللي لازم نسويهه ...
من اهم الامراض اللي لازم نسوي فحص دوري عنهن هنه السكر وارتفاع ضغط الدم خصه اذا كان احد افراد العائله يشكو من واحد من ذني الامراض لان الهه طبيعه وراثيه ..
بالنسبه للعمر اللي لازم نبدي بي هو عاده 35 سنه (وهذا مو شي ثابت حسب اطلاعي يختلف من منطقه لمنطقه ) ...
1. ضغط الدم ... يلقب بالقاتل الصامت !! وطبعا اكتسب هاللقب من تاثيره بشكل مباشر على اغلب الاعضاء الموجوده بالجسم .. كمثال ممكن يسبب عجز كلوي وممكن يسبب مشاكل بالقلب والشرايين الرئيسيه وشي اكيد هاي الامور ما تصير الا وره فتره مو قليله من بداية المرض يعني بمعنى ثاني اكتشاف المرض بمراحله الاولى رح يمنع حدوث مضاعفاته ورح يسمح السيطره علي ومنع تفاقمه بابسط علاج ممكن
2. السكر ... وهذا يحتاجله موضوع مستقل لاهميته وان شاء الله نحاول نكتب شي ولو بسيط عنه في قادم الايام
3. نسبة الكولسترول بالدم لان الهه علاقه رئيسيه بامراض القلب والشرايين
4. الاملاح خاصه املاح اليورك اسد ( uric acid ) لان الهه تأثير على المفاصل بصوره خاصه ..
وبعد غيرهه من التحاليل كنسبه الهيموكلوبين (فقر الدم ) وتحاليل اخرى توصف بحسب حاجه الشخص .
يعني اللي احب اوصله من خلال هالموضوع انو الصحه من اغلى الاشياء اللي يمتلكها الانسان فلا نفرط بيهه ما رح تضرنه ساعه او ساعتين كل شهر او اكثر (حسب المده اللي يحددها الطبيب المسؤول بالمكان ) نروح بيهن لاقرب مركز صحي حتى نسوي فحص شامل من الممكن تجنبنه العديد من الامراض ومشاكلهه ..
اتمنى ان اكون وفقت لايصال الفكره ...
ابعد الله عنكم شتى الامراض ودمتم بود وعافيه ...
رد مع اقتباس
المشاركة الأصلية كتبت بواسطة Faviya
