هنا

[Hani Yaqoub]

قلت بغير موضوع ان رغبتي جانت ادخل بحرية ولهل السبب من طلع معدلي 85 وانا ماجل درسين كلت شنو اسوي بيهن
ما جانت عندي رغبه بالهندسه اما الطبيه فد شي مقزز بالنسبه الي فماها اهواها ابد
فعقلي قفل على البحريه والسبب لاو ولد وصفها الي وانا بداية دخولي للاعداديه وسولف الي عن سفر احد اقاربه او معارفه والدول
و و مع بعض الامور التي يولع لها قلب شاب مراهق فتعلقت بيه وصارت هي هدفي وهدف ابن عمي وهدف بعد 3 طلاب
وكال المعدل الي يردونه 80 مو اكثر
والحمدلله والشكر بذاك الوقت جنت ساذج جنت اصور ماكو شي اسمه منافسه واختبارات حتى تنقبل
فيعني تجيب 80 تنقبل تطلع بحر تشوف العالم الحلو
معدلي نزل صار 81 تقريبا والسبب الانكليزي قدس الله مقامه
ورحت للبحريه وطلع مقدم عليه بال150 ويردون بس 30 والسالفه تنافسيه
للابناء الاساتذه 10 درجات على المعدل والهم اولويه كذلك اولويه لاصحاب المراكز السياديه
اخيكم سمع بالخبر ونعلس من الفك للفج بالهجتين
هنا اطلب دخول الواسطات والمعارف العائليه

[Hani Yaqoub]

اول واسطه فكرنا بيه واستخدمنها هي ابن خال ابوي استاذ بالجامعه فجان من حقه ان يقدم طالب وكذا
وبالفعل تواصلنا ويا وراجع ويانا بس الي صار ان والدي جان دائما يجي وياي
وانا استحي من سالفة الواسطات والى الان احس وقته بالانتقاص فبيوم الاختبار جان مطلوب مني ان اوصي علي حتى يجي للاساتذه انا غلست ورحت وحدي
الاختبارات بالبحريه كانت
اولا اختبار سباحه
جنت مو قوي هواي بالسباحه بس اعرف لان بيت جدي بابو الخصيب واحنا اصلنا من الفاو فتجري بيه جينات البطه
ومثل ما يكول الشاعر فرخ البط عوام على فرض عدم وجود اي علاقه بين هذه الكلمه وكلمة مثلية المتداولة
صدف ان اول شخص تم تسجيل اسمه بالسباحه انا
والسباحه جانت بنادي الرباط اهل البصرة يعرفونه جان الجو بيه براد
تصعد على منصه قفر وتقفز بالمسبح ابو 9 الي عمقه تقريبا 3 متر وتطلع من الطرف الثاني من المسبح
المشاكل جانت اولا انا ما طافر من هيج ارتفاع عالي قبل ثانيا ما سابح هيج مسافه ثالثه الخوف
حليت هل المشاكل من شفت سباحين موجودين فكلت ماكو مشكله ان اغرك وهمه يطلعوني
وهل الفكره ساعدتني ان اصعد
سمعت من بعض الطلاب انهم يخلونك توكف بابو 9 ويسألونك عن مواد الدراسه حتى يشوفون قدرتك بالسباحه
انا جنت ماعرف اوكف بالماي وهاي تعلمته قبل سنتنين فقط
فمن قفزت بالماي بقيت جوه الماي اسبح الى ان وصلت بابو 6 وكملت سباحه وهل الشي ما خلاهم يخلوني اوكف ويسألوني وخاصه انا الاول
ونجحت الحمد لله باختبار السباحه

[Hani Yaqoub]

الاختبار الثاني كان اللياقة البدنية
رحت للاختبار صايم
والدي بشبابه جان عداء مدري قفز ثلاثي فنقل الي جينات تم تطويرها بالممارسة الي
فجان اول اختبار ركص مسافة 80 متر فطلعت الاول
ومنه فطرت بشرب جرعه ماي من صنبوره او حنفيه الماي المالح الموجوده بالبحريه
الاختبار الثاني كان ركض 400 متر هنا الوالد ما كدر ينقل الي هيج جينات نشطه
من حيث هاي تطلب ممارسه ببالنتيجه فحطت بنص السباق وطلعت الثاني
باختبار العقله حسب الاستاذ غلط وطلعني انا ولد نفس الشي
اختبار الشناو مدري شنو ترتيبي جان بس هم زين
البعض راح يتصور جنت قوي جسديا
لا حبيبي بصوت السيد
جنت استعد لهل الاختبارات قبل فتره لان سمعت عنه فمارست رياضه وركض بالنادي وبالشارع مالتنا حتى اصير هيج
بس رمضان خاني كلش

الفحص الطبي طلع زين مابيه شي

[Hani Yaqoub]

الاختبار الثالث جان من قبل مجموعه من فطاحلة البحرية عددهم 6 او 8 او مابينمها راسهم كبير مقارنه براسي وسعة ادراكي
الاختبار يسئلونك عن دراستك وعن معلوماتك
بما اني من الناس الي ينسون بسرعه فما اذكر جاوبتهم اي سؤال عن دراستي ابد لان جانت بالفيزياء والكيمياء الي ابد ما اذكر شي منهن بعد 3 اشهر من انتهاء الامتحانات
وهل الشي كفيل بان وزارة التربية والتعليم ان يدكون زنجيل من نوع هندي بيه سجاجين على الوقت الي ضيعوه علي
بس جنت قوي بالاسئله الاعامه بشكل بحث الاساتذه انصدموا
وكالو انت طالب سادس المفروض ما تعرف هي الاسئله
مثل ما كلت سابقا جنت اقرا كتب ونسيت اذكر اشتريت بعض الكتب الخاصه بالاسئله والاجوبه ودرختهن للتسليه والتفاخر
وهل الشي خلاني اشعر بالفخر كدام الاساتذه فاكبني الله على منخري
سؤال بسيط بالاخير ماعرفته وهو ام الربيعين من هي ماعرفته
الاسئله العامه جانت كلشي يجي ابالهم منه
انت تباوع تلفزيون
اي
شنو يطلع بالوقت الفلاني البرنامج الفلاني ليش هيج شنو الدافع منه
اسئله بالقران اسئله عن الحياة اسئله يمكن من سيربح المليون لان جان مشهور وقته

اخذت بهل الاختبار 9.5 من 10 وهل النتيجه جابه قرايبنا لابوي وهو بلغني
الشكر للاساتذه ما نقصوني علمود الدراسه

ما قبلوني بالبحريه لان معدلات المتقدمين اعلى مني بهواي مع الواسطات
علما بعضهم نقبل وهو ظل يرجف باختبار السباحه وما قفز

[Hani Yaqoub]

تعقيب على ما سبق
الى الان ما غشيت حرف واحد من تخرجت من السادس لحد الان
سنتين بالمعهد
6 سنين بالمحاسبة ( اجلت سنيتن بمنتصف السنه لاسباب مزاجيه )
سنه بالهندسه
صارت فرصه انقل بالهندسه بمادة الحاسوب بكوز
بما ان هل الشي خالف مبدئي هنا رجف دماغي وما كدر يفتهم المكتوب بالورقه اشوف الورقه بس ماعرف انقل الي بيه ولا اشوف الي بيه
هل الشي اسعدني ومستمر عليه
كل درجه اخذه هسه استحقاق باقل جهد وهل الشي افتخر بيه

[Hani Yaqoub]

ما طلع قبولي بالبحريه ضجت جنت بوقته مقدم على المعهد وعلى الانسيابيه
الانسيابيه جفصتي التي لا شبيه لها الا جفصة الشيطان من صار اخو خيته الغير مخلوقه وعاند ربه علمود شوي سجده ايطكطكه على السريع
من كتبت الانسيابه كتبته انا طبعا
خليت اداب قبل العلوم والتربيه
فهنا الحاسبه العبقريه شي طبيعي لكفتني لكف للاداب وكالت هيت لك
هذا الانسان الي راح يغير البشريه
الانسان الي تحده التعين من اجل الطموح
فطلع قبولي اداب وهنا جانت صدمه ليست بمستوى تؤهل ظهور معشوقة الجيل السابق والحالي الاء حسين لان جان جوه ايدي وقته البحريه ومعهد النفط
بعد ما فقدت البحريه مثل ما فقد ادم الجنه شعرت بالندم والحزن
خابرت ابوي كتله راح انسحب من المعهد واقدم على الكليه الاداب ابوي كلي براحتك الي تشوفه سوي
جان عندي امل بالاداب قسم الانكليزي احسن قسم بيه الترجمه علساس ماكو قواعد
وجان اقدم على الاداب

[Hani Yaqoub]

الاداب ليس كما يعرفها الجميع
قبل الصولة
قبل المالكي
جانت
تدخل للقاعه الي تملي بيه الاستمارات والي بنفس الوقت جان طلاب السنوات السابقه والمتقدمه علينا متواجدين
داخل كل قاعه رجال لابس اسود باسود ولحيه وشكله داعشي ماكو فرق
يكلك انت وين تكعد ويه وين تكعد وابتعد منا ومناك مشيرا باطراف اصابيعه الي تتراقص بينهن السبحه مدري ليش لون السبحه يجي ابالي تركوازي (عرفت اللون من البنات التميز عنواني وكات حقوق النشر مهمه)
الجامعه قبل الصوله مو مثل ما يصورها الجميع جانت مكان مسيطر عليه من الاحزاب
وكلنا نذكر ضرب طلاب الهندسه بالسفرة

جان اسمي اعلى واحد بالمتقدمين للاداب بجدول الاسماء وطافر هواي عن الربع
رتبت ما تهواه نفسي الي علساس قطبي الرحى طحنت الافكار و وصلت للاستنتاج
الترجمه اولا
الاداب نكليزي ثانيا
و عربي
تاريخ
جغرافيا خامسا
وجان يطلع القبول اداب عربي
فوقعت بالصدمه الي نصدمه ادم وره ما نزل للارض واكتشف ان اكو حاجات يخرجه جسمه بعد الاكل مدري صدمة حواء لان معضلته اكبر
وجان ارقن قيدي راسا واقدم على المعهد

الحمدلله جانت هذه افضل حبكه قدر فرضها رب العالمين علي
لو ما صاير هل الشي وياي بهل الدقه جا تيقنت ان ماكو الله
لا
دخلت المعهد وتخرجت
وتعينت بنفس السنه
وراها دخلت محاسبه
وهسه هندسه
والحياة جرت افضل من الي سارو بغير طريقي

[Hani Yaqoub]

الحكمه من الي صار
اذا جفصت بالسادس ماكو مشكله يمكن جاي يصير الك شي احسن مما تصور
او شي اسوء مما راح تدري فلا تضوج
يجوز راح تضوج تالي اكثر من هسه فخلي ضوجتك لبعدين او راح تفرح

[Hani Yaqoub]

الحكمه الثانيه من الي صار
لا تبذل كل جهدك على الدراسه
الاوائل ما تفيد تضيع وقت وعمرك
تونس بالجامعه اهتم بالمواد الاساسيه الي راح تمارس بيه عملك
واعشقه لان هاي اختصاصك
وتعلم سوالف وانت بالجامعه
ولا تستعجل ايام الاجامعه تخلص

الان اشعر بالندم لان انتهت السنه الاولى من الجامعه

[Hani Yaqoub]

الحكمه الثالثه من الي صار وياي مو من الي حجيته قبل شوي
لا تعرض كل الاوراق مالتك لكل الطلاب من تدخل للجامعه
لا تحاول تخلي شخص اول مره تعرفه يصير مقرب
ادرسهم عدل صادقهم كلهم
قبل نهاية السنه الاولى يلا تكتشف منو راح يكون مقرب الك
وبعضهم تكتشفه بالسنه الثانيه
و راح تختلف ويه بعض الاصدقاء بالجامعه او المعهد
وراح تحس انت على حق بس وره كم سنه
مراح تعرف منو الي على حق وراح يصاحبك شعور طفيف بالندم