قصيدة (لا تتأخر عليه )اداء :الحاج باسم الكربلائي
كلمات :الشاعر علي السقاي
ذكرى استشهاد الامام علي (عليه السلام)
2017 -1438 هـ
يعود الله ليالينا ** اذا باچر تلاگينه
الوعد يوم المنيه ** لتتأخر عليه
السلام عليك ابدي ** اورحمة الله يا علي
اشتاگتك فاطمه او تسأل ** انته مو مشتاگ الي
ما اعاتب وادري انته ** بجرح راسك مبتلي
لچن كافي الفرگه طالت ** لا تگلي اتحملي
يوم لو تتأخر اكثر ** اطلب الرب العلي
انه ارد للدنيه لجلك ** علي يا جنة هلي
صعب شوگي ولا اتحمل ** كسر ضلعي علي اسهل
واذا مشتاگ اليه ** لتتأخر عليه
يعود الله ليالينا ** اذا باچر تلاگينه
الوعد يوم المنيه ** لتتأخر عليه
انا المضطره ابمصابك ** واندعي ابمن يجيب
جرحك اشلونه يحيدر ** گلي واشگال الطبيب
بين نارين اجعلتني ** او مدري بالاكثر لهيب
هم اريدك ليه ترجع ** هم اريدنك تطيب
عندي حل وادري يعجبك ** يالصرت عگبي غريب
ابشوفة الاحباب يشفه ** او يلتم جرح الحبيب
فقط بسمه من الزهره ** او بعد ماكو اثر طبره
دواك اصبح بديه ** لتتأخر عليه
يعود الله ليالينا ** اذا باچر تلاگينه
الوعد يوم المنيه ** لتتأخر عليه
عفتك او لا شعره بيضه ** افراگي شنهو امسوي بيك
ارجع او يرجع شبابك ** وانفض اهمومك بديك
مثل ضلعي الطبره تشفه ** او بالدليل انه اجيك
خدي ذاك الچنت استره ** بعد ماستره عليك
ابعين وحده چنت اشوفك ** من اصد بعيوني ليك
باچر ابثنتين اشوفك ** خل تقر من التقيك
اتانيها من الفرگه ** تجي اللحظه اليصح ملگه
اوعلي او فاطم سويه ** لتتأخر عليه
يعود الله ليالينا ** اذا باچر تلاگينه
الوعد يوم المنيه ** لتتأخر عليه
امس ماتدري اشوضعنه ** وانته ساجد للجليل
مو على بضعة محمد **والسمه اصياح او عويل
انهدمت اركان الهدايه ** ابحين ناده جبرئيل
الينظر الهادي يضنه ** هو مو انته القتيل
او الله ليراويك حالي ** من شفت دمك يسيل
لا اموتن موت ثاني ** ادخيل يا حامي الدخيل
وانه لو ما إلي خاطر ** نبيك لا يظل حاير
يگلك رحمه بيه ** لتتأخر عليه
يعود الله ليالينا ** اذا باچر تلاگينه
الوعد يوم المنيه ** لتتأخر عليه
انه أسئل وانته إسئل ** نحچي وانرد الجواب
حسن واحسين اشخبرهم ** عگبي بسنين الغياب
إن چان تسألني اعله محسن ** كبر محسن صار شاب
ايگلي يا ريت المرادي ** ابسيفي راويته العذاب
اسمعته يدعي يا إلهي **لو دعائي مستجاب
العن اللي طبر حيدر ** والدفع عالزهره باب
يبو المحسن تره اوليدك** من العصره وهو يريدك
حچه ابدمعه جريه ** لتتأخر عليه
يعود الله ليالينا ** اذا باچر تلاگينه
الوعد يوم المنيه ** لتتأخر عليه
گبل متودع بنينك ** منهم اطلب يالامير
ينصرون احسين بالطف ** يوم ما يلگه نصير
ذوله من چنهم كواكب ** اربع اقمار اوتنير
يا علي صح اختيارك ** امهم ابلايه نظير
بقه اخر طلب عندي ** اخذ چف ذاكه الچبير
ابچفه خل چف العقيله ** او كافل الزينب يصير
انا الزينب ردت كافل ** او يلوگ الها ابو فاضل
او عگب هاي الوصيه ** لتتأخر عليه
يعود الله ليالينا ** اذا باچر تلاگينه
الوعد يوم المنيه ** لتتأخر عليه
ابرجعتك يبدأ شملنه ** يلتم وهذا وعد
باجر انته الحسن تالي ** ايجينه لو چبده انمرد
نجتمع بيت الرساله ** اربعه او ناقص عدد
انروح يم احسين كلنا ** ابكربلا انشوفه انفرد
دامي والشمر اعتناله ** او عالصدر ثنه او گعد
واغمض اعيوني او الاقي ** الراس مو يم الجسد
الشمر يضحك عگب ذبحه ** ابوجه زينب يهز رمحه
او تناديك السبيه ** لتتأخر عليه
يعود الله ليالينا ** اذا باچر تلاگينه
الوعد يوم المنيه ** لتتأخر عليه
-----------------------
-----------------
للتحميل بصيغة mp3
من هناا
رد مع اقتباس
