حرت ما بين أبطل بين أجاريك ..
بسك يا شعر محتاج راسي ..
أنه ألساني متر والموت شبرين ..
وخايف عله أطفالي من السياسي ..
كلشي يجوزلك واشتكتب يجوز ..
فدوه أرجوك بس عوف الكراسي ..
اكتب عالغزل عالفرح عالخير ..
لأن شعبك ولا شايف مأسي ..
البصر مرات يخدع بالك أتشوف ..
باوع عالوضع بعيون حوله ..
اغمد سيف حرفك بالك أتثور ..
العمر مرهون بالحرف التگوله ..
النفط والغاز يوصل بالأنابيب ..
بس عن الحسد خلينه چوله ..
لتهدد صرح يلسگفك أتراب ..
عندي أطفال مو وكت البطوله ..
ترف جلد الحيايه ارسمهه وتعيش ..
أموتك يا قلم من ترسم أطيور ..
حاير بالوطن شعليك ؟ شتريد ؟ ..
بيتك من خشب لتسب القصور ..
عمر صار أربعين نعيش عميان ..
تعلمنه العمى شيفيدنه النور ! ..
شعليك الحواجز حاطن البيت ..
عندك بيت خاطر تبجي عالسور ؟!..
الناس أبلا عقل لا تنصح الناس ..
منو أنته تجي وتريد تفسير ..
بالك تنتفض فكرك ترة تروح ..
اشبي هسه الوضع وتريد تغيير ؟! ..
ابتله المسئول بلوه بحصة الناس ؟!..
بشر هوه شني المسئول شيصير ..
الحصة اللي تجي والما تجي أتهون ..
علي مو چان ياكل خبزة أشعير ؟؟؟ ..
امدح لا تذم المدح هم زين ..
يسقط هالشعب تحيا السياسه ..
اجه نص الأمان الباقي هم جاي ..
سولف عالوضع بس أبكياسه ..
المعلم خل يموت يطبه طوبين ..
نحير بروسنه لو بالدراسة ؟!..
ولك بيع البلابل والحمامات ..
الحمامه أتفيد لو چلب الحراسة ؟؟..
ولك لو بيك حظ سويتني انسان ..
بسيطة أحلامي عايش عالأماني ..
عايش عالحچي ولساني محبوب ..
أعيش ابيش إذا گصوا ألساني ؟..
حلم عندي اعوف الشعر وأرتاح ..
واصفگ حالي حال البرلماني !!! ..
رد مع اقتباس
المشاركة الأصلية كتبت بواسطة مزاجية وكذا
