احلن ذيچ تطلع ذيچ من ذيچ ...
واحلن هاي تطلع هاي من هاي ...
لأن نفس المشاكل ضلت ادور ...
البلم ماراد يتماشه ويه مجراي ...
المايعرف يجيس يصير جايوس ...
اليجيب الطايره يسمونه رماي ...
نفس الجاي باچر ينحسب راح ...
ونفس الراح لا ماينحسب جاي ...
انه العندي وجه للناس شفاف ...
من وجهي بسهوله أتشوف مگفاي ...
اعيوب الكشفتهن سرهه مفضوح ...
اعيوب الدثرتهن نكرن اغطاي ...
اليحس نفسه چبير أبسرعه ينداس ...
الگاع شگد چبيره وهيه جواي ...
مره من النحبهم تمرض الروح ...
ومره اعله العگارب يوگف ادواي ...
الچفوف الترفه ماتحسملي موضوع ...
الچفوف الخشنه تكسر شوكت اعداي ...
نفس الماي يعطش ياكل الگاع ...
وعكس الگاع تعطش تشرب الماي ...
اليصيح بالسوالف حگه ماخوذ ...
اليسكت بالصياح اتسمه حچاي ...
اذا يتشابهن نفس العناوين ...
الزغار يموتن يضيعن بل أهواي ...
رد مع اقتباس
المشاركة الأصلية كتبت بواسطة عدنان الواثق
