صفت روحي حزينه وعاشگة النوح
وانا جفني بغيابك عاشگ الدمعه
وأذا اصبر الجفن شيصبر الروح
وطفل روحي بغيابك مابلغ سبعه
ياروحي بغيابك گلبي مجروح
وجنت انت بظلامي تصير الي شمعه
وأنا عگبك شبيه الطير مذبوح
وطحت عگبك حبيبي بمية ألف وجعه
تعبني الألم والصوت مبحوح
وخاويت الحزن بس انحب وأنعه
وجفني ماغمض كل وكته مفتوح
هجرني النوم راح وبعد شيرجعه
أصبر الروح گوه وجفني مفضوح
وگلبي على البعد صار الحزن طبعه
وأشييم بالصبر أذتني الجروح
وأفزع كبريائي المات بي فزعه
گمت أضحك جذب والجذب مفضوح
وترد تهمل دمعتي وتنزل بسرعه
أبحر حزنك حبيبي الگلب سابوح
ويصرخ ياحبيبي ومحد يسمعه
ويضل صوت الصدى بأذني وأبد ميروح
ويفز مجبور گلبي على الصدى يتبعه
أحضرني على بختك ياسفينة نوح
طوفان الحزن مايرحم بطبعه
تعال الگلب جن وجنن الروح
وطبيبي انت الوحيد وممكن تقنعه
تعال وخل أشوفك بلكي ارتاح
ويهدأ كل جنوني وأسكت بسرعه
انطر جيتك والباب مفتوح
ومشيت انت حبيبي بغير متودعه
وناذر لو تجي بس لحظة وتروح
تحت جدمك يصلي البيت الف ركعه
أحب غيرك أبد ياروحي مامسموح
قرار من الگلب مابي ابد رجعه
لان حبك ملكني وعشعش بهالروح
والحب ياحبيبي احساس موسلعه
عفت روحي على بيتك جسد مطروح
لان گلبي حديقه وبس الك زرعه
رد مع اقتباس