يگلك هذا واحد ..من الناصرية وحيد امه .. ومدلل خالاته .. جده الله يرحمه قبل لايموت زوج كل خالاته وطشرهن عالمحافظات .. فصارت مناسبة عدهم و التمن خالاته كلهن يم اختهن .. فشافن ابن اختهن وهنه كلهن عدهن بنات فگالن الها ليش ما تزوجين ابنج شو صار شاب واستحق الزواج فگامت امه صاحتله .. گعد يم خالاته .. فگلهن الله وايدچن .. التعرفلها مرة تناسبني انا ما أگول لا ..
فخالته اللي ابغداد گلتله
...
إذا رايد صدگ بالدنيا ترتاح
وتحس بمعنى طعم الماي والزاد
طب للعاصمة وإختار شتريد
اليجيها بحاجة بيده تسلمه المراد
ولا تتعب لون تدور الكون
ماتلگه مثل نسوان بغداد
....
هنا ظلت تحوس خالته اللي بالبصرة .. گلتله
....
إمشي وياي للبصرة وأراويك
نار البصرة جنة بكل حطبها
السمار البيها تحلم بيه القصور
و خسر دنياه الماضايگ رطبها
....
خالته ام النجف خو ماتظل ساكته .. سرفنت اردانها وگالت
....
بعدك شاب يبن إختي أرد أوصيك
بالك لاتغرك لذة الطيش
بت النجف شمعة بليلك تصير
وما حاجة أگلك يالولد ليش
تعال وياي حته بعينك تشوف
الله شضاملك عد بت الحويش
.....
خالته ام السماوة .. طلعت جكارتها وشعلتها ونفخت بحرگة وگلتله
.....
من تسمع حچي خالاتك تضيع
خالاتك تره عدهن حماوة
غلط اكبر غلط لو گالت الناس
بلائحة التراث نخلي ساوه
والمفروض لو بالدنيا انصاف
نحط بالائحة بت السماوة
…..
يمه هنا برزت خالته ام الحلة .. وفرشت عبايتها
…..
الحلاة يوليدي ماضايع رسمها
تره من الحلة،مشتقين اسمها
عتب بتك تره باچر يأذيك
اذا تكتشف مو من بابل امها
…..
هنا خالته ام كربلا ماتحملت بعد لان حست ابن اختها راح يضيع منها
…..
خالاتك تره ميشوفن بعيد
واذا ماشيتهن عمرك خسارة
مثل بت كربله ماتلكه بالكون
جمال وأدب وأخلاق وندارة
البالهندية خال فروخة محظوظ
هم يرتاح هم يشبع زيارة
… .
هنا طبت خالته ام العمارة وتوزرت بنصهن وگالت
…
يوليدي تره النسوان نسوان
البعده بالمهد من عدهن يشيب
اذا رايد نصيحة اتدنه لحذاي
يظل يرجف الماضايك دفو الطيب
اذا باچر طلابة تصير وياك
ال امه من العمارة بچيلته يصيب
… ..
هنا خالته ام الديوانية ادلت بدلوها
… .
إسمع مني وانت تعيش سلطان
خالاتك حچيهن ماله داعي
الديوانية بيها النثية ام بيت
دوم يظل فكرها وياك واعي
واذا لاسامح الله وباچر تموت
ترجعك عدل من عدها النواعي
…
فبرزت للساحة خالته ام الكوت
… .
يوليدي انصحك وانت عريس
اخذ احچايتي كون انت قابل
تره نسوان واسط يوسفيات
لان مثل الذهب كلهن سنابل
… ..
وبعد أن أكملن الحديث جميع الخالات جاء دور ام الولد
( وسون درب لام الولد اليوم تلعب چولة )
… ..
خواتي كلچن اعله العين والراس
سوالفچن ابد مو عنصرية
حچيتن والحچي المملوح مرغوب
يحفظچن الي رب البرية
بس وليدي ابوه وصاني من مات
وردة اختارله من المزهرية
بعرسه يجيب الها گلادة من طين
وإيزفها بملابس عسكرية
ولان يدري الوطن محتاج شبان
يخلف منها مو واحد .. سرية
وموجاي انتقص منچن يطيبات
لبني تلوگ بت الناصرية
منقول
رد مع اقتباس
يمه فدوه
يسلمو خالتو ع نقل كلش حلو..وهسه المره لكتله بعدهي؟
المشاركة الأصلية كتبت بواسطة •○●بیلسآنے●○•
