دجاج و بطاطا بطريقة غريبة و جديدة ... ابتكار ما حصلش
مساء الخير
شون الصحة ؟
بداية خلي انوه ... اني عُمري ما طابخ ... قبل عشر سنوات حاولت اسوي بيض لكن احترگت عندي وقررت بعد ما اعيد التجربة ... ولكن عندي صديقي يتفاخر بـ طبخ زوجتة و اني دائماً انتقد طبخها لذلك البارحة قرر يجي هو و زوجتة يمي و يتعشون اكل من طبخ ايدي (طبعاً دائماً اگول لزوجتة لو اني اطبخ يطلع اطيب منچ ^___^) ... المهم تورطت و خابرني البارحة كال سويلنة عينة بسيطة من طبخك و احنه راح نجيب ويانه كباب شوي و ضلوع ... فـ اطبخ شيئ بسيط
فكرت شنو اسوي واهلي كلهم مسافرين ... وصلت الى قرار اطبخ اكله محد مسويها قبل هع ... ما لكيت اسم الها لذلك قررت اسميها ... طبق ثاني (من باب الاختلاف ومحد مسويه هع)
بدأت شغل ساعة ١٢ الظهر
المكونات
١_ ٩٠٠ غرام افخاذ دجاج (مع ازالة الجلد لان ما احبه هههه)
٢_ بطاطا (ما اعرف شگد الكمية بس گشرت و عيني ميزاني)
٣_ حب رمان
٤_ خل تفاح طبيعي
٥_ ٣ ليمونات
٦_ كركم
٧_ فلفل اسود
٨_ معجون طماطة
٩_ كاتشب
١٠_ ملح
١١_ بزاليا
١٢_ لبن
١٣_ زيت زيتون
طبعاً ماكو مقدار معين عند وضع المكونات لذلك عينك ميزانك ^__*
بعد ما خلطت هذه المكونات و صارت الصلصة تذكرت والدتي چانت تخلي سڤن آب لـ الكيك ... ما اعرف شنو رباط السالفة بس هي مليوصة گلت بقت ع هاي و چان اخلي علبة سڤن و صارت فعلاً اچلة بچتلة
بعدها نبقي البطاطا و الدجاج داخل الصلصة و نوديها للثلاجة ... نبقيها لمدة ٤ ساعات ... حتى الاكل ياخذ الحموضة مال الصلصة ^__^
بعدها نطلع الطبخة و نحطها بـ تبسي
نفتح الفرن (بالبداية بس النار الجوه) و نخلي على اقل حرارة ... نبقي التبسي لمدة ساعتين تقريباً يستوي و ينسنس على كيفة ^__^
وراها نفتح النار الفوكَ و نطفي الجوه ... نخلي تقريباً ٤٥ دقيقة ... بعد ان اكتمل الشوي ... هذا الشكل النهائي ^___^
(الاكل مو محتركَ انما هذا اللبن يصير لونه اسود ^__*)
الحمدلله تمت المُهمه بنجاح باهر و گالوا عاشت ايدك بس بعتبارهم اعداء نجاح ادعت زوجة صديقي انها تسوي اطيب منها المهم انا واثق بنفسي هههه ... صراحة اني ما اذكر المكونات شنو لو ما اخذ صور من البداية هههه ... يعني اجت عدلة ... عثرة بدفرة ... سويناها وصارت
و من موقعي هذا اتحدى سوزانا اذا گدرت تسوي هيچ اكله خرافية ... يلا انتظر طبخة من ايد سوزانا و بدأت المُنافسة ... بعد شيخلصكم مني حتى طبخ گمت اعرف اطبخ يعني شدوا روسكم يا گرعان ^______^
تحياتي
الشيف / انسان ثاني ^___^
رد مع اقتباس
المشاركة الأصلية كتبت بواسطة دكتورة وطن
 
