قبل جم يوم خلص اولمبياد لندن، التجمع الرياضي المهول اللي بعد مليار سنة ضوئيه ما نكدر نسوي مثله واذا بلد عربي دبرها فعليه الفلوس وعلى الغرب الكافر كل الشغل.
الأولمبياد بالنسبه اليه جان عباره عن مصدر مغثه.
ما أنغثيت لأنه العراق بلد الحضارات رياضييه جانو مو بالصورة اللائقة ومحد عبر المرحله الأولى وبعدنه على مبدأ المشاركه شرف.
ولا انغثيت من شفت الوفد العراقي بالأفتتاح لابس تراكسوتات الأحماء الفقيرة وما عرف اي مسؤول يلبسهم زي عراقي شويه يبيض الوجه.
ما غثني الوفد العراقي من عرفت مشارك بثمانية رياضيين فقط كلهم شاركو بالبطاقات المجانيه ولا واحد كدر يجيب رقم يأهله.
ما غثتني الراميه العراقيه اللي جابت المركز الأخير بالتأهيل حالها حال أي احد يسدد على هدف.
ما غثني العداء المصري اللي كال على يوسين بولت "عداء عادي ما بي فرق عن الباقين" لأن يوسين بولت تصرف بتواضع وما شاف روحه عليه.
ما غثتني مشاركة السعودية برياضيات لأول مره والصحافه السعوديه شرشحتهم للبنات والتوتر السعودي سوه هاش تاك اسمه (.........) الأولمبياد لمناقشتهم.
ما غثتني لاعبة الجودو السعوديه المكروده اللي خسرت وره 82 ثانيه وجان كل همها ما يطلع شعرها وما همها الخسارة.
ما غثني فوز البحرين بمدالية عن طريق عداءة اثيوبيه جنسوها حتى تركضلهم وهيه مرفوض اللجوء مالها بسويسرا وكندا واميركا وانكلترا وأعضاء بالبرلمان البحريني ينتقدون الشورت القصير مالتها لأن ما يكدرون يشوفون سيقان بنيه.
ما غثني فريق المصارعه المصري اللي ما عرف شوكت موعد النزالات وأجه متأخر وما خلوه يلعب.
ما غثتني فضيحة منشطات رياضيي المغرب اللي العالم فاتح حلكه من وراها.
ما انغثيت من عرفت قرش قرطاج اسامه الملولي كل حياته وتدريبه بأميركا ويسبح لتونس لأن ما عنده غير جنسيه.
ما انغثيت من قريت مقالات تمجد المشاركه العربيه لأن فازو ب12 مداليه وهيه كازخستان فازت وحدها ب 13 مداليه.
ما انغثيت من عرفت رياضيي اميركا غالبيتهم العظمى يلعبون ببلاش لأن همه طلاب واذا ما عدهم رعايه من شركه ماكو أي قبض ولازم يدفعون ضريبه لأن المداليات مصنوعه من الذهب ومع هذا جابو 114 مداليه وفوزهم اساسه هوه حب المنافسه وحب بلدهم.
ما غثتني الهليله اللي سووها نشامى الأردن لفريق التايكواندو اللي نكدر نكول مو خسر وانما اتشحطط.
ما غثتني عداءتنه المثابره دانا عبد الرزاق من كالت راح افوز بذهبيه بالأولمبياد القادمه.
ما غثني العراق من استبعد رافع اثقال عراقي ارقامه قياسيه وسبب الأستبعاد بعده شاب ما عنده خبره واخذو رباع ارقامه ضعيفه لأن عنده خبره.
ما غثني رعد حمودي من كال احنه اكيد ما نحقق شي واكيد نفشل لأن الدول متقدمه علينه بمراحل ومع هذا مدا يستقيل وما اعرف شنو دوره اذا هيجي مستسلم.
ما غثني من عرفت العرب بتاريخهم ما جايبين مداليه برياضه جماعيه لأن الرياضات الجماعيه ينرادلها تفاهم واحنه ما شاء الله بهاي السالفه.
تدرون شنو الغثني، غثتني المانيا اللي فتحت تحقيق واستدعت رئيس اللجنه الأولمبيه للبرلمان لأن فازو ب 44 مدالية، فقط لا غير، وهمه جانو حاسبين يفوزون بثمانين ويريدون يعرفون الميزانيه المخصصه وين راحت وليش فشلت بعثتها.
تحياتي للشباب الواعي
رد مع اقتباس
المشاركة الأصلية كتبت بواسطة النجمة المتلئلئة
