يفراگ امس
هلبت مسيتك تلتهي بطيحة شمس
هلبت عيونك بالموادع تنترس
حنيت وعيوني نذر كل طيف بي زفه من امس
ليل اليحب مرشوش هلهوله وعرس
معذور بس ما تنعذر
مثل المطر ينباگ من حضن السما
وللگاع ينزَف چم عمر
يل غافي حدر المستحى وتتواكح بشم الزلف
مرات اشوفك كل هلي ومرات اشوفك مو عرف
طفّيت بيه اشگد نظر
چا ما تراودني همس ؟
تشتاگلي وحزنك يرد بس تاخذك عزة نفس
يالماتجي ودربك ذبل
چا ليش جدمك ما ركض من شافني بسچة زعل
چا يمته اشم مايك عطش
واتناوشك شهكة جرف
ليش الرسايل تنعصر لو جاس طاريها الظرف ؟

إيما صباح