درر العراق

احمد الفجراوي · 20/April/2017

أسعد الله اوقاتكم جميعاً من أعضاء وزوار ..

أكو حقيقة ثابتة محد يگدر يغيرها .. إنو الكل يدعي المواطنة الصالحة والوطنية وحب الوطن ..

وكل واحد يطبقهن من منظوره الخاص سواء باتباع مبدأ أو موالاة حزب أو شخصية سياسية يعتقد بوطنيتها وأهليتها ونزاهتها ..الخ

وطبعاً اللي يتبع مبدأ أفضل بكثير من اللي يتبع حزب أو شخصية .. ليش؟!

لأن المبادئ الصحيحة ثابتة ماممكن تتغير .. أما الاشخاص والأحزاب فممكن جداً يبيعون وطنيتهم ومبادئهم وقيمهم وتتغير أهدافهم ..

وللأسف اغلب العراقيين مايتبعون مبدأ .. يتبعون أشخاص وأحزاب أثبتت فشلها وضررها واضح.. تأخذهم العزة بالحزبية والمذهبية والدينية والمناطقية .

بعيداً عن كل مقاييس الاختيار السليم والمهني ..

والمشكلة زيادة على اتباعهم للفاشلين يتخاصمون بيناتهم ..

يعني لمن يجي واحد ينتقد شخصية سياسية أو دينية .. تلگي المقابل يتحول فوراً إلى بؤرة من بؤر الصرف الصحي (أجلكم الله) ويتلفظ بألفاظ حتى الأجانب اللي انسميهم كفار ماممكن يتلفظون بيها ..

وكأنك سبيت أحد من أهله ..!!!

بالمختصر :

اللي يريد يحجي بالوطنية لازم يكون عنده مبدأ ثابت وولائه للمبدأ مو لشخص أو حزب

ولازم يحترم الآخرين اللي يختلفون وياه بالرأي ..

ماممكن تكون مواطن صالح وانت اتهمش وتلغي البقية حتى لو كنت على حق ..

طبعاً اللي خلاني اكتب هذا الموضوع هو نقاش عقيم دار بالفيس بوك أزعجني ..

وسلامتكم