...
الليله اموت
الليله اخر ليله
الغيم مد ايده اعله راسي
والمطر شد حيله
الليله گطرات العمر
ناطگو حب سهران
يمه ادخيلچ..
اترجاچ
ضميني بسواد الشيله
الليله ليله
هد عليه الليل بخيول الظلام
منين اجيبن حيل ويرد خيله
حيرتني اضنوني موتي
اوف نعشي اشلون اوصله الباب اهلنه
ومن يگابلني عيله ونشيله
الليله اموت
الليله گلبي ينام دافي
وتندفن وياه حرارة چيله
الدم ينبع من سراديب الضلوع
ويرسم جروحي على الفانيله
وطير من بين الضلوع يطير
وتلحگه السهام
وقيس يخسر ليله
وگمر سكران اعله ميز اقمار
ضيع ليله
تفيض روجات الحسافه
وتكسر الشط
يا سنيني الرايحات..وداعة الله
انطيني بوسه...موادع الخل الخليله
يا نخل يا عاگر احبل
ضوكَگ طعم الفاجعه بموتة فسيله
ويصيح
يا هور الحزن..
لا تغفه يا هور الحزن
تابوت اجاك اويه الگصب
بهداي حطه عالجرف
ومحمداوي امن الگلب غنيله
يا مطر
ياسيل..ودني اعله نهران الحبيب
بلچي اصادف صورته
شي باقي منه
اثر چدمه عالرمل
واشكيله
ونزع اعيوني براحته
وهي العيون امعلمه
اشتبچيله
چن ربابة كاولي اتزتني بعتابه
وترگص الغربان
عالجثه الثگيله
يا طيور الليل
وديني اعله ناسي
اليموت..
يشوف..يسمع..يلتفت.
ينكسر گلبه ويعرف اليبچيله
تمنى
وعادة الموات يتمنى ويجيله
انا اتمنى
الشته..وحضن الحبيب
وسيف چاتلني گبل هالليلة
كاظم اسماعيل الگاطع
رد مع اقتباس
المشاركة الأصلية كتبت بواسطة ღالـعلويه المـــوسـويهღ
