هذا مطلبي منچ يجوريه
چلمه وبيهه للمجروح حنيه
ونگطة عسل من شفتچ الورديه
أهواي أتمرمرت بهواچ ياعيني
هذا مطلبي منچ يجوريه
چلمه وبيهه للمجروح حنيه
ونگطة عسل من شفتچ الورديه
أهواي أتمرمرت بهواچ ياعيني
أهواي أتمرمرت ياوردة ألقداح
بعيونچ سحر وبخدچ التفاح
أبشرع الله ردت نتزوج ونرتاح
وكل عاشگ أعزمه من تفرحيني
كل اهل الطرف يدرون احبك
وليل انهار گاعد عله دربك
ظالم ياحلو ومنكسر گلبك
وعالي ياگمر متنوش أديه
عالي ياگمر وأيدي گصيره
عندك يابدر روحي أسيره
گالوا بالوفه كلمن ضميره
ومنك ماشفت لحظه هنيه
منك ماشفت راحه يغالي
حاير بالهوى ومشدوه بالي
دگلي ياحبيبي أشلون تالي
مالي عله أفراگك قابليه
مالي عالهجر مهجه يعيني
وعشر أشموع أنذر من تجيني
اسرار الهوى بينك وبيني
وليالي ألشوگ عشناهه سويه
ليلي الشوگ تنساهه أبسهوله
وأني أوياك عشنه أمن ألطفوله
أعيوني من تمر منك خجوله
أسكت من غصب والبيه بيه
أسكت من تلاگيني يمحبوب
ويظل ألگلب من بعدك أيلوب
لو صار ألعشگ يمدلل أذنوب
ماريد الذنب ينغفر ليه
ماريد العمر لو طال بجفاك
جهنم جنتي تصبح بلياك
لصيح أبصوت عالي ألگلب يهواك
وأكشف بالهوى أسرار الخفيه
أكشف يم هلك وأهل الملامه
سر گلبي يمحبوبي وغرامه
أحبك ياحلو أليوم القيامه
وبيوم الحشر نوگف سويه