هنا

[عامر رشيد]

بعدهه تريد جيتك..چم جرح بالروح
تسحگ عالملح وتخضر أجدامك
ورخي حزام خصرك سودنيت الناس
مو ضاگت الوسعه بشدة احزامك

[عامر رشيد]

عله خمرة شفافك طشريت أحلام
وأنته أعله المرايه أطشر أحلامك
شتحط؟ ياسياج؟ مبين البستان
شگ صدر السياج وطلع شمامك

[عامر رشيد]

أنه جامات عمري يطگن أمِنّ تفوت
وعله خدك..حچايه وينكسر جامك
تدري النار تصعد بيه إذا مريت
وأطفه..ومن وراي يصعدن آثامك

[عامر رشيد]

ماصيرن وراك الدنيه بيه ادور
لا اگدر اعوفك وامشي گدامك
اتفاقيات رادوا بسمك يعقدون
وأجت كلهه الدول تتوسل أبهامك

[عامر رشيد]

وماوقعت..موزغرآ ولكن عيب
ياهي من الدول تتگدر أولامك!
الدول أعلامهه أعله الساريات تصير
وأنت معلگات بصدرك اعلامك

[عامر رشيد]

وماريدك تجي...وتجيب دمعه وياك
اريدك من تجي تجيب الفرح كله
وعلى عتبة عيوني تحل ضواك خدود
وبّاب المشاعر شعرك تحله

[عامر رشيد]

وعله شعرك أتوله وبيدي البسك تاج
وانت عله الجرح والنزف تتوله
وأحلفك بالعشگ..بالمستحه البشفاك
بدم آخرجرح بالروح تندله

[عامر رشيد]

چنت تشتاگلی؟ لو بس حچي الينگال
وإذا گلبك يعن بليل شتگله
وچنت مثلي تغمس بالجگاره الليل!
يكبر جرحك وتتوسل الذله

[عامر رشيد]

وهم أتاني جيتي وتحلم لملگاي؟
وتكفر بالحلم چي مالحگ حله؟
واگلك مو مهم چنت انه افكر بيك
انه بعازتك هسه العتب خله

[عامر رشيد]

بس دايخ بطعم شفايفك والليل
مل مني وزهگ بس انه مامله
تمرين عله خدك كاتبه من سنين
ولو مية سنه يمرَّن ولا أحله