روج تراب
ينده كل ضباب المستحه وبالعين خظّر باب
وچفوف العليهه شما عله الدخان
تصعد والسمه لسر الدعه سرداب!
تصعد والعطش صلى اعله كل شفّه فرض خنياب!
تصعد للبواچي الكسرت الصفنات.
والصفنه مواعيد وحلم غيّاب
كل صفنه حلم چذاب!!
كل شهگة ضوه بوجهك شمس وتصلي فوگ تراب..
كل سجدة عطش محراب
كل شمرة نفس غيمه تفيض اعله التراب فياي..
وبگايه الريح تحدي بوجهك ويه الماي..مدري اشخبط بوجهك زراگ الماي؟
ومدري شگالت عيونك رحت لو جاي؟
لومن عثرن چفوفك بگيت تصيح
رايح للشمس صوتك نذر بالريح
رايح والنجوم طيور عد باب الغباشي تطيح!
امس شباچنه يجيب الشمس بالريح،
امس طيف الصبح تسبيح
امس كل گطره تطفه اعله الرمل تبچيك
الضلمه الباگت رسومك توضت بيك
شتلات الضوه بعيون الحديثات ورّد مستحاهن بيك،
هاا يالمشتعل بالماي بلچن حزنك يطفيك
بلچي من الطيوف البيض سنبل للصحو يوعيك!
وتغرگ بالفرح عيني واگلك هالخذاني البيك
يامزنه خذاني البيك!!
واگلك گوم نومك حار خايف لاحلم يچويك
وخايف تحترك وادري الفرح مزنه
وخايف لاتفارگنه السفر صفنه!
السفر ليله تطشرنه وترد طيوفنه تلمنه
والوذ بساتر السكته وجه خوفه بكبر دربه
نسيت النوم بعيونك لذيذ الخوف بالغربه
ونسيت الناس تالي الليل كلمن يعثر بربه!!
ورضيت اشتعل بالضلمه شمع وحدي
الوحيد مرايته تصلبه
.
رد مع اقتباس
