لاتنقهر ..
عندك عذر ..
خليني وحدي ويه الفجر
باجر اضل مشتاك الك لاخر نفس بالريه
لاتنقهر وادعيلي بس ..من الله ينطيني الصبر
باجر لأن اول صبح من دونك يمر بييه
اكتبلك ودمعي حبر .. لوتدري هسه شبييه ..
لاتنقهر ..
ردتك الييه شكد ردت نلصم حلك هذا الوكت
ردتك الي مثل النهر وانه الجرف لجلك صرت ..
ليش اسكتت ؟ .. اني المتت ..
و ك انت صابك بس جرح
وانه الشلت هم الصبح
وانه الأجه بظهري الرمح
دمعي النزل ماينمسح .. وجفوفي ماتمسح دمع
لن جفي هو يريد اله واحد ينشفله الدمع
لاتنقهــر
صوج الدهر .. طيحني واني تأخرت
هوسه وعجاج وماشفت ..
لمن كمت ..ملكيت احد لمن كمت
مالومك انت شماصرت ...هو اني من وحدي ضعت ..
لاتنقهر ..
ما ادري درب الحب خطر
ولا ادري مكطوع الدرب
وما ادري بيك ترددت .. لمن شفت وكتي صعب
حبيتك ومافكرت ..شفتك نبع صافي وعذب
لاتنقهر ..
انت المهم عندك كلب
باجر تحب .. باجر تضل مثل السهر
كاعد لحد خيط الفجر ..
اني اعترف كلبي انكسر
واني اعترف صار الألم مثل المرض بييه انتشر
وبأذني يزرع همستك
وبعيني يرسم صورتك
وشكد صور !! مشتل صور ..
زارعني اني بفييه
وك موبدي ..غصبا علي ابقه اذكرك يوميه ..
ساكت بعدني وماكلت
من جرحي بعد انت اشفت .؟
هذا الذكرته (مختصر) .. من الجرالي شويه ..
هذا الحصل بييه الامس ..واليوم اضن صار الأمس
ساعه وتمر بينه الشمس
وتجيب وياهه الصبح
لاتنقهر ..
طبعك مرح ..
لاتنقهر وادعيلي بس ..من الله ينطيني الصبر
اليوم الي اول صبح من دونك يمر بييه ..
اليوم دربي مو وعر .. كلش وعر ..
واليوم تمطر بس جمر..
فوك الوجن .. فوك العمر
فوك الليالي الي مضن
فوك الشهور الماوفن .. وسفه العشك حي اندفنن ..
جوه الكره الارضيه ..
اليوم كلشي يحترك .. متضل قصيده ولاوزن
والمشكله بكلشي اذكرك ..لازم اذن ..!
حته الاذن .. سدت علي كل السبل
اليوم اضن ..مسدوده جن كل السبل
وانساك ؟ ما اكدر جذب فكره اعتقد ممحيه
ما انسه ادري وراح اضل
بالنسبه الك ورقة شعر منسيه
راح ابقه وك رغم الحصل
اتذكرك واتعذب بروحي واشل ..بس شأشل
بضمادي اشل جنت الجرح
وك هسه بضمادي الجرح
يعني بإدي لازم اشل ايدييه ..
اكبر كفر ..
لمن تحب واحد يوعدك بالفرح
ولجيتك ماينتظر .. اكبر كفر
من تبرد وتموز الك جان الحضن
وتروح تركضله ركض
ومن توصله باخر نبض
تلكه الشمس مطفيه ..
صاير ثلج تحت الصفر
تحت الصفر ... للميه ..
هيجي انت صاير للأسف وياي ابد ماتنحزر
هاهيه شو كلشي انتهه واني الجنت ذاك النجر
ميت صرت فوك الارض جثة عشك مرميه
لاتنقهر ..
لوكطعت بيدك ورد وتعصره بجفوفك عصر
وترد عليه بقسوتك وتـــشمره من ايدك شمر
يموت الورد ..لكن بديك اينام مجبور العطر
مثل الورد بيدك جنت بييه شكثر حنيه
لاتنقهر ..
صوج الوكت ..طيحني واني اتاخرت
بطران وك اني شكثر غركان ثاريني جنت
باحلامي الورديه ..
لاتنقهر ..
عندك عذر ..
وادعيلي بس ..من الله ينطيني الصبر
رد مع اقتباس