ابو ذيات جديده للشاعر سعد البندر
كلبي كل معاني الحب جسدهه
وباب الشامت اليكره جسدهه
كضت روحي تعال انضر جسدهه
مساوي الكاع ويتاني المنيه
***********************
الوكت طشار يبن امي غدانه
وتيهنه عشانه من غدانه
اذا جان الامس الكم غدانه
ويبين كل وفي وذاته وفيه
***************************
غريج ابحر حبك وانتشلني
وحطني ابين اديك وانتشلني
اذا شامت يكلك انتشلني
كله انه الذي صرت الضحيه
**********************
حبي الك ماينوصف وصفه
بصفات الذهب لا وشويه اصفه
طبيبي كلي مرضك ماله وصفه
وكعد بالكاع ضل يبجي عليه
*********************
تعال امسح دمع عيني ونشفه
ومد ايدك على جروحي ونشفه
انه البوسات البخدك ونشفه
وطعم شفتك يداوي جروح بيه
***********************
المحبتك ابد ماحاجه براهين
مثل برهان ومضيع براهين
ضل طول العمر يركض براهين
وبس التعب حصته والاذيه
**********************
شما بعدو يضل كلبي محلهم
وياما ذنوب دلالي محلهم
لون كضيتهم والله محلهم
اجلب بيهم وشيفك اديه
********************
فرحنه ابجيتك النه ونسعدنه
ويوم انشوف وجهك ونسه عدنه
اشو محد نشدنه وين سعدنه
شاعرنه اليصوغ الابوذيه
************************
جبل حبك ولا يخفه ورتل
والك ايات اقرالك ورتل
ومع كل هذا تل كلبي ورتل
شرايين الكلب حطهن بديه
***********************
رضاك انته حبيبي مرضانه
لجن بعدك علينه مرضانه
نسيت شلون حبك مرضانه
وكضينه العمر حسرات واذيه
*****************************
احبك وانضر الشخصك وصدلك
واصيرن ساتر اكبالك وصدلك
صرت صياد من اجلك وصدلك
كلت بلكن تحن مره عليه
***********************
حبيبك ما نذر عمره سوالك
وضل غامض ولا ينحل سوالك
كلبي المانكر حبك سوالك
لوحة لصورتك مرسومه بيه
******************************
كضيت سنين عمري وياك كلفات
واضن هم صعب وكتي الجاي كلفات
زماني كبل يمشي وياي كلفات
لجن كلساع هسه يميل بيه
****************************
سجين اصبحت ياهو اليفك سجني
وجنيت هواي ضيم وبعد سجني
اخذعنواني يمك هاك سجلني
هلبت رحمة الله تحل عليه
****************************
غلط جان اختيار الكلب منحب
وبعد ما نوح وبجي عليك منحب
مو انه الزرعتك بيدي منحب
صرت شجره وكمت تعله عليه
***************************
بس هوه الذي كلبي فرحله
وتعناله رغم كلشي فرحله
اذا تحسب وقت حبك فرحله
لان ايام محسوبه عليه
***************************************
حبكم فاض بينه ماشحنه
وحجي العذال صدك ماشحنه
لجن لو يوم كالو ماشحنه
اعتقد للموت ما اجيسك بديه
****************************
صديجي يلوم بيه وانه لمته
لجن هيهات يوم تعود لمته
شوكت عود الزمان يلمنه لمته
وتصير وياك كعدتنه سويه
***************************************
علي ثوب المذله يخي مالاك
وتدريني بصحن محيوس مالاك
انه اصحابي وهلي يسموني مالاك
لان غصن الكرامه انزرع بيه
************************
حبيبي دورة عيونك شفنه
ويا ما ساوه بدروبك شفنه
الشفاكم حيل مشتاكه شفنه
وتداوي جروح جيتكم عليه
*****************************
حبك مارد اكليبي وفاته
وجزاه الفرح ما تانه وفاته
وصل حدهه تعال احضر وفاته
وتعال ابجي وبديك الطم عليه
***************************
اريد بلهفه وبنشوه ورشفاك
وابوسك بوسة امسودن ورشفاك
ماتدري شحصلي من ورشفاك
طبت وردود رد العكل بيه
*********************
علي ضيم وقهر منك تراكم
وبعد مااصدك اعيوني تراكم
انه كليبي اليحبكم ما تراكم
لان حبكم دواي ونفس بيه
*****************
احبك حب كبل لاصار لادار
يالمعدنك لاهو ذهب لادار
انه بلياك لالي اهل لا دار
ولا غيرك بشر يسال عليه
**********************************
حبيبي صرت بيدك خاتم انه
واسمك وسط كلبي خاتم انه
شجم قران لجلك خاتم انه
وصرت مرجع وحبك مرجعيه
*****************************
حط شفته اعله شفتي.. وخدراني
وصحيح انه اخدرت بس خدراني
شربت طعم شفته ...وخدراني
ومخبوط بعسل شفته سويه
****************************
انه بدنياي ماشايف فراهه
وعليه الوكت باحزانه فراهه
مرارة جبدتي بيده فراهه
وخله جروحي كلها تصل عليه
********************************
شكص من الحزن وكتي بنانه
وعلي بس انه ضل يومي بنانه
بتاوه اعله الجمر صاير بنانه
وماشة نار بيده ايكلي بيه
**************************
اريد اكتب شعر لجلك دواوين
واسالك كلبي المعلل دواوين
جانون الحرك كلبي دواوين
اريد بكل صراحه ترد عليه
**************************************
كلبي الي يحبه شكد وهبله
وريح الطب وانسامه وهبله
رغم دنيانه مجنونه وهبله
هداله الروح والمهجه سويه
*************************************
شعجب وياي حبك صار سكته
وتدريني بدموع العين سكته
انه بدونك قطار ابلايه سكته
اضلن بالتراب امشي اعله اديه
******************************
صديجي لا نشد عني وجاني
وانه وياه لامذنب وجاني
اجاني بس شعل ناري وجاني
وكام يلم حطب ويذب عليه
****************************
شبابي وياك بس انته حلالي
والك فدوه العمركله وحلالي
حبك مشكله وحده حلالي
اخذ كلبي ومشه غصبا ً عليه
****************************
تضن مليت من عدكم شملكم
ولوبيه بخت يلتم شملكم
ضل بالكلب باقي وشم الكم
بي مكتوب احبكم للمنيه
***********************
مثل بسمار حبك بسمراني
يالحنطاوي لونك بسمراني
طلبتك طلب واحد بسمراني
اصيرن لك جسر تعبر عليه
********************
الحنان يفيض بينه منه فضنه
وروينه كلوب طيبه ومنه فضنه
الزمان اشلكه عدنه من نفضنه
لكه حب وحنان وعاطفيه
******************
ولك شيفكني منك بعد شفتك
لان مثل الكمر بالصوره شفتك
اريد اليوم احط شفتي اعله شفتك
وندوخ اثنينه ونسكر سويه
*******************
كمر ويضوي عالصوبين وجهه
نظرلي ونار بالدلال وجهه
اذا عندك نقد بناء وجهه
ومقبول النقد منك عليه
*********************
يهد وكتي علي مره وناهد
وساعه يكتم انفاسي وناهد
شفت حلوات بس مومثل ناهد
شفافه ورقيقه وعاطفيه
***************
الحنان يفيض بينه منه فضنه
وروينه كلوب طيبه ومنه فضنه
الزمان اشلكه عدنه من نفضنه
لكه حب وحنان وعاطفيه
********************
ولك شيفكني منك بعد شفتك
لان مثل الكمر بالصوره شفتك
اريد اليوم احط شفتي اعله شفتك
وندوخ اثنينه ونسكر سويه
****************
كمر ويضوي عالصوبين وجهه
نضرلي ونار بالدلال وجهه
اذا عندك نقد بناء وجهه
ومقبول النقد منك عليه
*********************
حبيبي اخذ الكلب عندك امانه
وخل يشعر ولو مره بامانه
تعال وحتى لو تصعد امانه
المهم توصل واحضنك بين اديه
********************************
رد مع اقتباس
..