::
::
بكبر جرحك ندم بيّه..
ومابين الصدگ والظن ..
حزن يمتد مسافة موت
وبين الميت وناسه حلم مذبوح
صوت الفرح بلبل .. والصبح مرتاح
مرّ بروحي ..
حس مبحوح
نفس تعبان طول ذراعي
وبطول الصبر بعيوني يمتد شوف
وعيوني بصلافة (( عاهرة )) تريد الذراع يلوح..
والحرمان چف مالاح غصن التين
بس من شاف .. غيض البيه حلم
يمتد بعيد ويترك المطروح
وآنه وياك..
سيف وسيف
يمتد الحزن ركبه ذليله..
واحنه نمتد على گده نلوح
اخذني وياك..
يل زعلك غيوم تغطي الولايات
آنه هنا ..
وزعلك ريح تصهل .. شالت التعبان
صفره الريح؟؟
حمره الريح ؟؟
سوده الريح ..
طاح الما اله جنحان
وآنه هنا .. جنح ينحر صهيل الريح
وجنح ملتهي يلولي عليك يالزعلان..
گمر ينزف ..
راد يلحگ على الليل .. جرحه بطول صبر الگاع
وشفاف الجرح وكحات
نزف روحه على گد الليل
شال الليل..
وچفوف الشمس طاحت على الشباچ
ظل الگمر شاحب مالحگ بالليل
ساكت لا نزف ..
لا صوت ..
لاچلمات ..
شفتك بالحلم دفان !!
والدنيه گبر متلهف لملگاي
وشفت روحي گلب مذبوح
تلگّاني الگبر .. وچفوفك بلا شوف هدّني
وعيونك ....
مابين الخجل والخوف
حــــــــــــــــــــــــ ــزن
برموشهن من طحت غطّني
وشب بيه المكابر صوت
شب بيّه المكابر حيل
صوت يصيحكم ندمان
وحيل يكوم جف يشك ثنايا الموت
ويخّضر بحلگ المگبره بستان ..؟؟
وآنه هنـــــــــــــــــــا
أغنّي بحرگة المصيوب
أهمل وانتم تشربون..
أذبل وأنتم تخضّرون..
أخضّر وانتم تحصـــدون..
ومن زلـّـــــــيت..
صرتوا سيوف
أنزف وأنتم تذبحون
..
..
لطيف العامري
رد مع اقتباس
المشاركة الأصلية كتبت بواسطة عمو ساكه
