سولف غيرهن ذني افتهمناهن!
عله هذا الخذاك احچيلي يفهم بيك
واستوعب رموشك عرف معناهن؟
شلته أبينهن والچان بيهن طاح
ذبيته ألكبل بعيونه خلاهن!!
چا من شلته منهن ماحسبت يموت
ذاك ألكألك ماعيش لولاهن؟؟
البداك أعله روحه بلحظه تغدر بيه
البداك أعله روحه سنينه بداهن!
المهم سولفلي عن هذا الجديد شلون
من يشرب عيونك يسكر وياهن؟!
تهجه حروف خدك واللغة البشفاك
لو صعبن عليه ماكدر يقراهن؟؟
عله صدرك حظنته وسلمت وياه
تبدن بين أديه والشعر غطاهن؟
يخجل مثلي لو كلش تماده وياك
الماسويتهن وياك سواهن؟؟
سترت الذكريات بخانة النسيان
خو مافرعن وانجاب طرواهن؟
خاف يشم عطر من عندي عالقمصان
شد عيونهن واغسل خطاياهن..
ماعاتب بعد شيفيد بيك أعتاب
المافادن كبل هسه أترجاهن
تره هنه ألوفه والصدك هم صعبات
يكدرهن ردي وغدار حاشاهن
لاتسال شموعي شلون اخذهه الليل
مومسألة ليل فراك طفاهن..
السنابل هيچ من فاركهن الفلاح
طيح روسهن وتراب خلاهن
ولاتحسدني هنه البقن بس ضحكات
باچر ينتهن وتموت ذكراهن
مرات الطيور يغنن من الظيم
فك باب القفص دمعات تلكاهن..
عن ياهن احچيلك قسوتك فركاك
بياهنه ابتدي واختملك بياهن!
ماتذكر ابابك من وكفت شلون
اسولف والجدام أتعارك وياهن
وشفت چفوفك اللوحن بالله وياك
هيچ بهالسهوله وكلبك انطاهن!
ماتن كل صورك بيدي من رديت
وانه وصفنتي اصورك رثيناهن
انه وجفني ادمنه الدمع والليل
عشرة عمر ومن الصعب ننساهن
شرجعلك محطات الورود تموت
أذا شافن قطار النده أتعداهن..
ارجع والسنين وعمري المصلوب
وجروحك بركبة من خطاياهن؟!
كتلك كلشي أتحده القصور أطيح
وقصور المشاعر مااتحداهن..
أنت بلاوعي وهدمت بيه قصور
وانه بلاوعي وهدمتك وياهن
صرت بلاوعي وهدمتك وياهن
منقول مع ارق التحايا
رد مع اقتباس