بويه من ليل السبايا وحيرتي وظنوني
من ثكَل ذيج السياط اللعبت على متوني
من ألم روحي أصيح لوالدي ودوني
والله لو ادري اشوفك ما فتحت عيوني
انا رقية وحيلي منهدم
الكَه الدمع كَايدني لليتم
من نومي أفز واتذكر الحلم
بويه مشتاكَه اشوفك اغفه بين أحضانك
تدري أحب كلمة رقية حلوة من لسانك
عمتي كَالت لي ترجع حضريت امجانك
بوية جا ليش الخرابة مو مثل ديوانك
ظليت اتاني وجرحي ينلجم
من نومي افز واتذكر الحلم
والكَه الحلم كَايدني لليتم
المهم تانيت لكن ما شفتها رسومك
والله من كَد اشتياقي كَمت اشم اهدومك
احسب ايام وليالي وانتظاري ليومك
صار مدة ما اجيت ولا اجتني علومك
كل لحظة قطعة بكَلبي تنلثم
الكَه الدمع كَايدني لليتم
من نومي افز واتذكر الحلم
شكَد بجيت وغير جفك من ينشف دموعي
بالسبي يكَلولي سكتي وزاد خوفي وروعي
يتموني ولوعوني وحسرتي بضلوعي
صغيرة مو حمل المصايب لا تطفي شموعي
وحشه سماي ومختفي النجم
الكَه الدمع كَايدني لليتم
من نومي أفز واتذكر الحلم
لحظة من لحظات شوكَي اسرع من اقداري
روحي سألتني عليك وخلصت اعذراي
غمضت عيوني ولكَيتك بالحلم خطاري
فرحت كَلبي بقدومك يا ربيع أزهاري
بس ابقه يمي وتعبي مو مهم
الكَه الدمع كَايدني لليتم
من نومي افز واتذكر الحلم
ابلا وعي فزيت بوية وكَلبي فز من يمه
راد يطلع من ضلوعي شوفتك كل حلمه
عمتي شافتتني اركض إلها بهمة
هي هم ركضت عليه وانه اصيحن عمة
بعيوني طيفك بعده يبتسم
الكَه الدمع كَايدني لليتم
من نومي افز واتذكر الحلم
عمتي صاحت ها رقية شبيج يا دلالي
جاوبتها عمة زينب شفت ابويه الغالي
من بجت احساسي كَلي ما تردلي تالي
للاسف ضاعن سويه طيفك وامالي
باقي الحلم بخدودي ينرسم
الكَه الدمع كَايدني لليتم
من نومي افز واتذكر الحلم
رد مع اقتباس