خلصنا الفترة الصباحية وبقيت وحدي أنتظر المسائية، باقي المدرسين راحو لأن ما عدهم محاضرات مسائي، نعست ردت الّا شوية أغفو بالغرفة مال تدريسيينبس سمعت من بعيد كلام بيه قسم القانون فبسرعة كعدت عبالي جايين الطلبة ، طلع السيد العميد يتفقد الأقسام وفعلاً دخل للغرفة مال التدريسيين سألني كم سؤال ، الله ستر لو جنت غافي جان صارت سالفة مو حلوة
بارحة الطرق كلش مزدحمة وصلت للكلية متأخر مع إني طالع من وكت ورجعت للبيت متأخر كلش وهم جنت طالع شوية من وكت قبل نهاية الدوام المسائي لأن ما داومو الطلبة بارحة ما أدري ليش، يمكن الازدحام بسبب معرض بغداد الدولي
بارحة أسأل الولد (ليش بس البنات يشاركون وانتو ساكتين؟) كالو (استاذ ضامّين نفسنا للصعبات هذني سهلات) شوف التفلسف ، آني هم كلت (ماشي أساتذتنا بلانيول ودي لو بادير وديكيه، آسفين مخلّيكم هنا) طبعاً [دي لو بادير وبلانيول وديكيه] من أشهر أساتذة القانون الإداري في تاريخ فرنسا خاصةً والعالم عامةً.
شلون زمن أغبر، صار الطالب يتحكم ويفرض إرادته على الأستاذ (اليوم ما أكدر أداوم .. ما أكدر أحضر بيوم الامتحان أريد تأجيل .. آني موظف أريد أداوم نص شهر) أوووووف من اشتعل مذهب ال....... دمّر العلم وسحل الشهادة
كل هالتحطيم اللي تمارسه الحكومة للشباب العراقيين فوكاها يجون الأساتذة المتقاعدين وجمالة أعمارهم فوك الثمانين سنة يريدون ينافسون اللي توهم حاصلين ماجستير بالتعيين، يمعود أنت أبو السبعين مدري ثمانين سنة: حجّي .. عَمّو .. جدّو .. دكتور: أي شي جنت المهم لخاطر الله وخاطر الرسول بس شوية اكعد .. ارتاح ببيتك .. اشرف على رسائل ماجستير وأطاريح دكتوراه .. اكتب بحوث، بس المهم عوف التدريس للأساتذة الشباب اللي حتى ما لاكين شغل .. مو جنابك هَم عندك تقاعد هَم تشرف على رسائل وأَطاريح كل هذا وتريد تشعل روح الدولة وتدرِّس بكليات أهلية وتخلّينا احنة الشباب نركض ورة العمل مثل جوعان يتسول من الناس ولك مو حرام عليك من العن دين الشهادة العندك اذا تحرم غيرك من العمل وتستحوذ على كل شي.
هسة لو بيكم حيل تشرحون وتفهمون الطلبة هَم نقبلها بالكوة ونكول ميخالف ، أشو الطالب يريد أستاذ شاب يكدر ينزل لمستوى فهمه المبتدئ ويشرح له بأسلوب واضح وصوت عالي وهالفقرات كلهن ما بيكم، عمي نصكم تفصيخ مال نودّيكم لشيخ عُمَر نبيعكم مواد احتياطية .
للإخوة من خارج العراق (شيخ عُمَر) اسم شارع في بغداد تصلح فيه السيارات والمكائن وتباع فيه موادها الاحتياطية.
مدري يا قشمَر طلَّع هالمعلومة الغلط ؟ يكولون (مرحلة أولى لازم يدرسهم شخص عنده شهادة دكتوراه وحاصل على مرتبة أستاذ يعني بروفيسور) زين بس سؤال ليش هو البروفيسور رح يكدر يفهِّم مرحلة أولى وينزل لمستواهم المبتدئ؟ أكطع ايديني اذا دبّرها بس شنسوي للعراق اللي كلشي بيه تحطيم للشاب ينعمل بيه.
شوية فضفضت عن كم شغلة مضايقتني لأن بزعت روحي منهن شسوي الله الكريم وإليه المشتكى.
المهم خطية صف أول عدنة يمكن رح يبكون، دخل الهم استاذ الدستوري أول محاضرة انطاهم تحضير 23 صفحة، دخل استاذ مدخل القانون هم انطاهم 20 صفحة بس هم زين تراجع وكال (هذني اطلاع فقط)، يابة شباب على كيفكم وية مرحلة أولى ترة خطية مو مال تكربوهم بالتحاضير وتخلّوهم يكرهون المادة، بالنسبة الي انطيتهم 10 صفحات بس مو تحضير مجرد اطّلاع.
صباحك مسك صديقي دائماً حين أمر بصفحاتك هنا وأقرأ كلامك أندمج كثيراً لدرجة أشعر بأني كنت داخل القاعة أحضر تلك المحاضرة أو أمشي بذاك الشارع وأرى التفاصيل كلها .. أحياناً أبتسم حين أقرأ مذكراتك أحياناً أحزن لبعض الصعوبات التي تتعرض لها بيومك .. لكن بالعموم هي جميلة حقاً ولا أجاملك أستمتع كثيراً هنا .. أتمنى لك من كل قلبي كل التوفيق والصحة والعافية .. دمتَ بخير صديقي ..
مساء الخيرات ، اول شي خلوني أشكر الصديقة العزيزة دائمة التألق هنا (فتاة المطر) شكراً من كل قلبي وأتمنى لكِ التوفيق الدائم
هسة نكتب، خطية طلبة مرحلة أولى قسم القانون صارو لاجئين، القاعة مالتهم بيهة صيانة مدري شي ثاني .. المهم صرنا نوديهم بين القاعات كل قسم اذا تفرغ وحدة من قاعاته ناخذها مؤقتاً، بلكت يخلصون هالاسبوع ونرجعهم لأن صراحة ضاجو
رد مع اقتباس