هنا

[د. حسن سعيد]

أول ما داومت جذبت انتباه الكلية .. كلمن شافني ظل صافن لأن كامش عصا بيدي اضرب بيهة الأرضية حتى أنتبه اذا أكو حفرة أو صعود أو نزول أو أي شي، بالنسبة الي المسألة كلش عادية لكن السيد العميد وعدد من الأساتذة والطلبة سألوني عن العصا، والنوب شافوني أستعمل اللابتوب والموبايل بالبرنامج الناطق استغربو أكثر، الهدف من كتابة المشاركة هاذي مو الغرور ولا اعتبار السويته انجاز الي لكن أريد أبيّن الكم الغموض وعدم المعرفة بقضايا المكفوفين عند المجتمع للأسف، في حين بدول أوروبا أو الخليج العربي هاي أشياء كلش عادية اليشوف مكفوف بيده عصا ميسأله شتسوي بيهة لأن الحكومة مسوية برامج توعية للمجتمع ومعرفته بالمكفوف وبنفس الوقت موفرة للمكفوف سبل السهولة بالتعامل مو مثل الحكومة العراقية هاملته بشكل مفرط وبصورة عمدية وعندي الدليل اليثبت تعمّد الحكومة بالإهمال.

[د. حسن سعيد]

اجت امتحانات نهاية الكورس الأول، المادة اللي أدرّسها خلو مدرّسة تقرالي واني أكلها تخلي الدرجات بالدفاتر، مو هنا السالفة .. السالفة اللي تضحك بامتحان المادة مالتي رحت للقاعة دا أوضح الأسئلة ، واحد من الطلبة اشتكى من الصعوبة وكال (أستاذ ممكن تغيّر السؤال)؟ ليش شكالولك احنة ببرنامج من سيربح المليون واني جورج قرداحي؟

[د. حسن سعيد]

الحمد لله تقدم جيد كورس أول ينتهي بنجاح كامل محد رسب عندي، كورس ثاني تتبدل مادة المدخل لدراسة الشريعة الاسلامية اللي درّستها كورس اول واجاني بدالها قانون حمورابي، أيضاً استاذة اللغة الانجليزية اعتذرت عن التدريس واني اخذت المادة صار عندي مادتين كسبت ثقة السيد العميد والسيد رئيس القسم.

[د. حسن سعيد]

للأسف نهاية شهر آذار كانت مزعجة قليلاً، اضطريت الى التخلي عن التقديم لدراسة الدكتوراه في السنة القادمة بسبب عدد أيام الدوام بالدكتوراه 4 في كلية الحقوق جامعة النهرين وهي الكلية الوحيدة اللي تمنح شهادة الدكتوراه بالقانون الدولي في بغداد والمشكلة الكلية اللي اشتغل بيهة مينطون تفرغ أكثر من يومين حاولت أخلي كلية الحقوق يسمحولي أداوم 3 أيام عندهم و3 اداوم بكلية الهادي اللي أشتغل بيهة ما رهمت بالتالي تركت الدكتوراه حتى أحافظ على عملي والله كريم بالسنين الجاية.

[د. حسن سعيد]

بارحة دا أصحح دفاتر امتحان انكليزي ، الله يساعد الموظفة اللي كانت تقرالي، اكو جماعة خطوطهم مسحوكة والكتابة غلط واليقهر أكثر فد واحد صاير خوش ولد مدري بنية كاتب لي الجواب بالعربي، الظاهر عباله آني ما أعرف الجواب بالعربي فحب يكتبلياه والمصيبة البطل ما كاتب الانكليزي بس عربي. فففف

[د. حسن سعيد]

بارحة رحت لوزارة التعليم العالي، أريد أشوف مالاتي الأوليات وين صارن لأن جنت مقابل وكيل الوزير وعلى أساس يعينني بجامعة النهرين لو ما يجي حيدر العبادي ال...... ويوقف الدرجات الوظيفية، المهم ردت أقابل مدير الادارة دخلت للاستعلامات سألني الموظف (وين تريد) كتله (لمدير الادارة) كال لي (عندك موعد) طبعاً كلت لا لأن صدك ما عندي موعد، الخبيث ما خلّاني أدخل شكد حاولت وحجيت له عن سالفة التعيين ومقابلتي للوكيل غلّس كتله (سهّل أمري جاي من الحرية ما أكدر يومية أجيك) رفض يكول ما أسهّل أمرك عندي ضوابط .. مسوي نفسه شريف براسي ، ولكم تصلون وتصومون وتأذون الناس وما تساعدوهم، عمي اشمرو صيامكم وصلاتكم بأقرب كابسة نفايات واضغطو أمر press حتى تنكبس بعد متكدرون تسوولها اعادة تدوير ، شنو الفايدة تسوي نفسك متديّن وأنت تأذي الناس؟ ما أشجّع على ترك العبادة بس ليجي واحد يكول لي فلان يصلي لو يصوم لو .... معناه خوش آدمي ترة يزيد الملعون قاتل الإمام الحسين هم كان يصلي رياء كدّام الناس والدواعش هم يصلون مع انهم احقر المخلوقات.

[د. حسن سعيد]

بعد جدل وية العينتين رحت لشخص سهل أمري النوب دخلت أدور على فايلي الجماعة الشرفاء مضيعيه ، تخيلو كل الاستمارات اللي أصحابهن مقابلين الوكيل كاتبين اسم صاحب الاستمارة ورقمها وتاريخ المقابلة ولأي جهة تحولت الّا استمارتي بس الاسم والرقم والتاريخ .. أما وين تحولت تاركيها فارغة، وكل شعبة أروح لها تحولني على شعبة ثانية ما شاء الله خوش ناس وخوش حكومة ملعونة

[د. حسن سعيد]

انتهى العام الدراسي الأول لي وأنا مدرس لا طالب، حققت نجاح كامل في الفصل الأول وبسبب اهمال اثنين من الطلبة رسبا في مادة اللغة الانجليزية التي أُدرسها، لكن الحمد لله باقي الطلبة نجحو وبعضهم بمعدلات ممتازة.

[د. حسن سعيد]

حيييييييييييل صار شكد ما ناشر هنااااا !!! صارن كومة سوالف حتى نسيتهن بس رح أكتب اللي اتذكره

[د. حسن سعيد]

العطلة وما أدراك ما العطلة أهم شي كأس العالم شجعت اسبانيا كعادتي وخرجت من دور مبكر كعادتها بس العجبني بالدوري بلجيكا وكرواتيا وخيبت ظني الكرة العربية فاااشلة