أحسن شي بالعطلة سافرت للشمال وية العائلة كم يوم بأربيل شبعت ونسة وتصوير -ولو طلعت من خشمي مضاعف بعدين- بس هي ونسة على كل حال
أحسن شي بالعطلة سافرت للشمال وية العائلة كم يوم بأربيل شبعت ونسة وتصوير -ولو طلعت من خشمي مضاعف بعدين- بس هي ونسة على كل حال
نسيت أسولف لكم عن قضية اتحاد المكفوفين المشعول، اكو نية بتشكيل اتحاد عام يضم مكفوفي العراق وباعتباري قانوني كلفوني ضمن اللجنة التي تتولى كتابة نظامه الداخلي، وساعة السودة -على كولة أمّهاتنا- كلما اكول على شي هذا غلط ميصير يطلع لي فد واحد يتعيقل ويكلي خبرتك قليلة واني تطفر روحي لأن اعرفه كلاوجي يدور مصلحته واتلاطم وياه
خلي أكتب أحسن مما أظل ضايج، المهم خلصت العطلة ورجعت للدوام بداية شهر أيلول -الشهر التاسع- زين ما عندي اكمالية بس واحد بتاريخ القانون و2 بالانكليزي مشيناهم وخلصنا، بس المشكلة خط ماكو والدنيا كلش حارة يعني مو مال نفرات فجنت اروح وارجع تكسيات يعني القَط الزين
ولو محد يتابع مذكراتي بس المهم أكتبهن يجوز يجي يوم أحتاجهن ، شفت السالفة خربانة والجو شوية برد كمت اروح واجي بالنفرات يعني رجعت أيام التعيين الاولى والجهاد هههع تخيلو اربع سيارات بالروحة من البيت واربعة بالرجعة بحيث اطلع ساعة 6 ونص الصبح وارجع ساعة 3 ونص اذا مو 4 العصر متفلش تفليشاً مبرحاً حتى غدا زين ما أتغدى
في الشارع تجد مختلف الشخصيات، الهادئ .. العصبي .. المحترم .. الخ... في يوم كنت كاعد من النوم بالكوة ومتضايق من شغلة البارحة، المهم صعدت كيا من ساحة عدن للبياع -مثل كل يوم- بس هالمرة مختلفة، صعد رجال شايب مبين عليه تعبان بس من أهل قبل يعني قافل توب،هي تحركت السيارة والحجي الله يطول عمره استلمنا كرستة وعمل دك تفليش عالحكومة والنوب الشعب وراها الأحزاب -خصوصاً جماعة إيران- سحلهم سحلة مال x ومربّع واحنة ساكتين بس نريده يبطل كلام بس الحجي منطلق عالدَوْلي محد يكدر يوكفه ، السايق يريد يهدئه بس العم مُصِر بَل ويزدادُ إصراراً -أصرَّ يُصِرُّ إلحاحاً على كولة عادل إمام-، تدرون كل هالهوسة ليش؟ لأن قبلها بيوم صاعد بكيا للبياع سائل السايق (توصل للإشارة؟) السايق كايل (إي أوصل) بعدين ما موصله للإشارة واصل للكراج -يعني قبل الاشارة- ومنزل العبرية فالحجي طافرة روحه من سالفة بارحة والظاهر مشبّه على السايق مال اليوم فمستلم الوضعية تسقيط، طبعاً نص معلوماته غلط بس منو يكدر يكله غير ينفجر عليه هههههه ما أكول لكم آني راسي دايخ وروحي طافرة وهذا الله يغفر له زيَّد الدوخة ردت الّا شوية لو أشمره من الجامة لو آني أجيِّت من الجامة وأفلت
سيارات البيّاع وما أدراكم ما سيّارات البيّاع، ورة يومين من سالفة الحجي المذكور أعلاه، هم ركبت للبياع وجان يطلعن وراية 3 نساء مو عربيات ، طبعاً استلمن الطريق سوالف ما شاء الله مو لسان تكول شاجور مال رشّاشة ههههه المهم وحدة كامت تصيح (بَيّا بَيّا) مستمرة كل شوية تعيدها واحنة صافنين هاي شتريد؟ هسة لا هي كردية لو ايرانية حتى نفهمها بالدفعات ولا تعرف عربي أو انكليزي حتى أحاجيها مدري باكستانية لو بنكلادش، المهم طلعت الخالة تريد تكول (بيّاع) بس مدتعرف الحاصل أشرت لها على الأمام وكلت yes it is بياع ، ترة اخوكم مترمج -مترجم بلهجة احد اقربائي الأطفال-
من يجيك أستاذ كبير السن وعنده دكتوراه والأضبط مشتغل بالجانب العملي من اختصاصك كون تلزم ورقة وقلم وتسجل كلامه لأن نصه معلومات تفيدك، الاثنين المضى اجانة الدكتور عبد الأمير حسن جنيِّح زيارة للكلية كعد بالقسم ظل يسولف صراحة استفادينا منه لأنه هم دكتوراه وهم كبير بالسن يعني عنده خبرة وهم هو بالأصل ضابط ومكمل قانون بحيث واصل عميد بالشرطة ومتقاعد يعني خبرته العملية بالقوانين الجنائية خصوصاً قانون أصول المحاكمات الجزائية واسعة بس غلطتي ما طلعت التليفون وكتبت معلوماته ولا طلبت رقمه حرامات ، تندمت على هالغلطة
اذا تريد تسحب معلومات من دكتور اول شي شوفه مرن لو جامد؟ منطلق لو هادئ؟ المرن مرح يتعيقل براسك من ينطيك المعلومة .. رح ينطيكياها بشكل يخليك تستهوي قراءة المقال اللي كتبه بينما الجامد أو المتكبر يمن عليك بالمعلومة عبالك تشتغل عنده .. المنطلق يتجاوب وياك بسرعة ويغسلك بالمعلومات بينما الهادئ يساعدك بس مينطيك شغلات هواية لكنه أكيد أحسن من المتكبر. هاي تجربة شفتها خلال مخالطتي للأساتذة الكبار، المهم بعد ما تشوف الدكتور كدامك قبل ما تسأله عن أسماء بحوثه وكتبه حاول تعرف بطريقة غير مباشرة اسمه الثلاثي ولقبه العلمي -مدرس مساعد / مدرس / استاذ مساعد / استاذ- بس ديربالك تسأله هيج روح شوف موظف أو اقرة اسمه بقائمة التدريسيين، الخطوة الثانية ابحث عنه بغوغل اخذلك فد بحث من بحوثه اقراه خزن براسك كم معلومة منه وحاول تصيغ سؤال تسأله للاستاذ بحجة تريد تستوضح عن هالموضوع اللي هو كاتبه واذا بيه مصادر لزيادة المعلومات، هنا تبين اذا الاستاذ مرن ومنطلق رح ينطيك معلوماته وأسماء بحوثه ومؤلفاته بشكل سلس ووافي ، ما رح أذكر أسماء الأساتذة اللي ساعدوني بمعلوماتهم حتى ليصير افشاء سر بس جزاهم الله خير الجزاء كلش فادتني كتبهم وبحوثهم
قرأت واستمتعت وكأني كنت معك في هذه الذكريات رغم ضيقي من أمور كثيرة أمر بها إلا أني ابتسمت هنا بين حروفك وأخذتني معك في رحلة عمرك الجميلة أدعو الله أن يحقق لك كل ما تتمنى وأتمنى لك السعادة الدائمة وبالتوفيق
الشكر الجزيل لكِ على طيب المرور، أسأل الله أن يفك عنكِ الضيق ويوفقكِ ويحقق كل ما تتمنينه ويديم عليكِ البسمةالمشاركة الأصلية كتبت بواسطة فتاة المطر
رد مع اقتباس