انتهت المرحلة الرابعة وانتهت وياها مرحلة البكالوريوس، خلص رح أودّع أصدقائي قسم بيهم مرح أشوفهم والباقين نلتقي كلش قليل، أخير يوم كان شعوري غريب كعد وحدي بزاوية الغرفة صافن أتذكر شريط حياتي بالكلية وضايج لأن رح أفارق أصدقائي، شعور مزعج شوية كآبة.
انتهت المرحلة الرابعة وانتهت وياها مرحلة البكالوريوس، خلص رح أودّع أصدقائي قسم بيهم مرح أشوفهم والباقين نلتقي كلش قليل، أخير يوم كان شعوري غريب كعد وحدي بزاوية الغرفة صافن أتذكر شريط حياتي بالكلية وضايج لأن رح أفارق أصدقائي، شعور مزعج شوية كآبة.
عطلة صيفية تكاد تخلو من الراحة، بعد ما انتهت الامتحانات بأسبوعين وبمجرد ظهور النتائج انفتح التقديم على الدراسات العليا (الماجستير) كان لا بد من التقديم للماجستير وفعلاً رحت للكلية قدمت عليه وبديت أقرة مرة ثانية الى أن اجة الامتحان التنافسي وامتحنت والنوب صار القلق يلازمني ليكون ما أنقبل.
رغم قلة الراحة بالعطلة المذكورة لكن حصل تطور تكنولوجي مهم بالنسبة الي، ربطت خط انترنت لكومبيوتري ولأول مرة بعد 3 سنين رجعت أستعمل النت، أكيد ناسي 90 بالمية من المعلومات اللي كسبتهن بدورة معهد النور عن الانترنت، لكن طبيعتي أحب المغامرة كعدت أجرب كلشي وبالبداية خربطت الوضعية بس بعدين تعلمت للنت وسويت فيسبوك .. [ولو ضربت حسابين بسبب تصرف خاطئ باعداداتهن بس بعدين سويت حساب ومشت أموره].
بعد جهدٍ جهيد بامتحان التنافسي مال ماجستير اللي كان يوم 8 أيلول 2013 وانتظار وقلق أخيراً واني رايح لحفلة التخرج الرئيسية اللي سوّتهة الجامعة في 28 أيلول سمعت بقبولي بالماجستير وما صدكت يجي ثاني يوم حتى أروح ركض للكلية وأتأكد بنفسي من لوحة الاعلانات وشعبة الدراسات العليا، الحمد لله انقبلت ولو صارت مشكلة راد يطير المقعد لكن بفضل الله وجهود الطيبين رجع.
بدأ الماجستير وبدأت الصعوبة وياه، هالمرة صعوبة أشد من البكالوريوس .. مطلوب دراسة معمقة وكتابة بحوث وقراءة كتب خارجية، مشكلة كانو الأهل بعدهم يسجلون المواد بالحاسوب لكن صارت الشغلة صعبة كتب هواية ومعقدة ووقت قليل، لكن الحمد لله والشكر صديقي هم مكفوف يداوم وياية بالكلية بس مرحلة ثانية بالبكالوريوس كلي عن برنامج يحول الكتب من صيغة pdf الى word ممكن نسحب الكتب من الأنترنت ونحولهن الى word ونقراهن حتى نكدر نجيب كتاب ورقي نسحبه بالscanner يصير pdf بالحاسوب بعدين نحوله word ، كتله يمعود رحمة لموتاك بس انطيني اسمه أو موقعه لأن محتاجه ضروري .. انطاني اسم الموقع أول ما رجعت من الدوام دخلت للموقع حملته نصبته وكعدت أشتغل عليه، اسم البرنامج abby fine reader أيضاً اجتني هدية scanner ثلاثي ملون بقيت أحول الكتب من ورق الى pdf بعدين word وأقراهن، هاي كانت نهاية معاناتي مع التسجيل اللي لازمتني من عام 2003 الى 2013. البرنامج سهّل علية قراءة الكتب بنفسي صرت أقرة الكتاب اللي أريده دون ما أتعب أهلي وبأي وقت ممكن آخذ الكتاب وأحوله وأقراه ، ساعدني كلش هواية بكتابة رسالة الماجستير مالتي.
نسيت أكلكم شغلة سويتها بالرابع أيام البكلوريوس : يوم كنت أتمشى وية أصدقائي دنسولف ونحشش على غفلة انكلب الشقة من اللسان للأسلحة صار مكافخ بالكتب والجنط كتلتهم وكتلوني وكعدنة نتدافع عبالك اعدادية ههههههه طبيعي طلعنة مكفّشين من ورة الكفخ بالكتب
بالماستر كنت قبل الأخير من حيث العمر لأن كلهم أكبر مني عدى بنية كانت أصغر مني، وأكو طلاب أكبر مني ب15 أو 20 سنة يعني مثل ابنهم، صراحة كنت مدلل زايد بالماستر من حيث الطلاب واللي يشوف نفسه صغير ومدلل تطلع وكاحته كلهة ما خليت أحد ما خبثت عليه، عندي صديقي من أيام البكلوريوس بس سجل بغير قسم لأن الماجستير مال قانون قسمين (عام وخاص) اني رحت عام وهو خاص .. بس نفس الكلية فنتشاوف بالاستراحة .. مرة كنا ضايجين كعدنة نتعارك بالأوراق والأقلام واحد يشمّر عالثاني ههههههههههه [فضحت نفسي]
أول كورس [يعني فصل] دمرونة خصوصاً الامتحانات النهائية مالته بحيث كنا ننام يومياً ساعتين يلة نلحك نقرة لأن الأسئلة صعبة وتركيز تكول عبالك صف سادس اعدادي بس بعدين الحمد لله بالثاني مشت الأمور أفضل خف الضغط وصارت الأمور أوكي
انتهت السنة الأولى [التحضيرية] نجحت والآن لازم أحدد عنوان للرسالة اللي رح أكتبها .. كان الأمر شوية محير لأن كنت متأرجح بين ثلاث اختصاصات (إداري / دولي / جنائي) لكن بالأخير استقريت على الدولي واتصلت بالدكتور حيدر وبحثت وياه عنوان وحددنا عنوان الرسالة الحالية اللي كتبتها، خليت خطة أولية ورحت للكلية سويت عرض للخطة أمام اللجنة المسؤولة عن قبول المواضيع وانقبل موضوعي وبديت أجمع مصادر حتى أكتب.
هالأثناء على مستوى الحياة العامة صار تطور مهم ، اتصل بية صديقي أيام معهد النور اسمه (حُر) كلّي (ليش متزورني للبيت مشتاق أشوفك وعندي شغلة مهمة تفيدك بس تعال وحدك لأن اذا اجة أحد وياك رح يخرّب المفاجأة) ، اني استغربت وحتى العائلة هم تعجبو ليش وحدي ؟! والأهم من هذا ما طالع وحدي سابقاً عموماً وافقو لأن بيت صديقي بالكاظمية قريب على منطقتي .. فعلاً رحت وانتظرته يم نقطة دالة اجة واستقبلني رحت لبيتهم ، الشيء اللي يفيدني كان تعليمي شلون أطلع وحدي وأستعمل العصا البيضاء الخاصة بالمكفوفين، شفته يمشي بيهة كعد يدربني شلون أستعملها ويانة كان صديقه حتى يشوفني أستعملها صح لو غلط، فعلاً كانت هاذي نقلة مهمة لأن صرت أكثر الأحيان أطلع وحدي أتمشى بمساعدة العصا البيضاء اللي اشتريتها لاحقاً.
رد مع اقتباس