بعيداً عن المذكرات مال الجامعة، اليوم ضايج تذكرت كم شغلة زفت زفت زفت، يا ربي شوكت ترحمني وتحقق الشي اللي أتمناه حتى أبسط شي ميصير
بعيداً عن المذكرات مال الجامعة، اليوم ضايج تذكرت كم شغلة زفت زفت زفت، يا ربي شوكت ترحمني وتحقق الشي اللي أتمناه حتى أبسط شي ميصير
بالعناد مرة دنمتحن مواريث انطفت الكهرباء ، قاعتنا مابيهة شبابيك اذا تنطفي الكهرباء تصير ظلمة ، الأستاذ سحب الأوراق وعاد الامتحان بس آني لا لأن ما غشيت كانت موظفة تكتب لي واجتني 28 من 30
غادرنا مرحلة ثالثة بعد تعب الدراسة فيها، عطلتها الصيفية كانت أفضل قليلاً من سابقتها بسبب وجود الحاسوب اللي قلل الروتين الممل لأن بديت أتعمق بتعلمه وجبت برامج منوتاج صوتي شوية إلتهيت بيهن أيضاً تليفوني الجديد nokia c5 بيه راديو وبعض الأمور اللي تجذب خصوصاً تصوير كاميرته شوية واضح وحجمه صغير خلّاني أصور أشياء وأسجل أشياء أريدهن وأنقلهن للحاسوب، أيضاً التدريب الصيفي بالمحاكم اللي يصير بين مرحلة ثالثة ورابعة هم قلل الملل اللي كان يصيبني.
أخيراً أجتِ المرحلة الرابعة .. يعني آخر سنة الية بالكلية .. يعني الختام بعد ما أشوف زملائي وأصدقائي اللي تعودت عليهم اذا خلصت هالسنة، كل السنين الثلاثة اللي مضن كنت فقير ما أضرب محاضرات غير مرتين أو ثلاثة بالسنة .. لكن بالرابع توكحت زايد صرت أضرب كومة محاضرات وأخلصهة فرات وية الجماعة، والعمادة هم شوية انطونة مجال كامو ميشددون علينا بالغيابات والزي لأن صف رابع يراعون بينة سالفة رح نتخرج ونروح للكآبة.
الله يلعن ابليس واني دا أكتبلكم مر الشريط ببالي وضجت من تذكرت شلون ودّعنا الكلية
مرة كنا مسوين عزيمة بيناتنة الولد مفروض أحضر وياهم لكن كنت داخل بندوة ، خطية الجماعة انتظروني ما أكلو الّا لمّن اجيتهم ، بحيث من دا أجيهم شافوني من بعيد كامو يصيحون (اجا الخير اجا)، شكد ظالم عايفهم جوعانين وجنابي العالي رايح بندوة اذا هسة أكفخني أحد يكلكم ليش ؟ هههههههههههه
الله أيام العزايم ، لو تشوفون شكنا نسوي .. يشتغل خمط المواعين يعني انت كاعد تاكل مالك علاقة بغيرك فد نوبة يجي واحد يخمط الماعون منك ويشرد لو يبوك الخاشوكة ، هذا غير التراشق بالفواكه واللي تنحشر موزة أو تفاحة بظهره (بين جسمه وملابسه) أو ينكفخ بيهن، أيبااااه والله أيام تخبّل
في مادة (قانون أصول المحاكمات الجزائية) صار السحك بفلس، ما أدري ليش بهالمادة ! مرة زميلي ديكول (جريمة السب) كال (جريمة الشب) آني مرة دا أكول (السرقة) كلت (السركة) وبعد كم سحكة ما متذكرهن، أما مادة (القانون الدولي الخاص) اللي كان يدرسنياها الدكتور حيدر أدهم [اللي صار المشرف على رسالتي بالماجستير] فكانت تختلف بالنسب الي..لأن مرات يشرح ويخليني أذكر كم معلومة للطلاب واني بمكاني .. بحيث مرة كال (هاي محاضرة مشتركة بيني وبين حسن)
بالسنة الأخيرة مال كلية لازم الطالب يسوي بحث تخرج: طلع عنوان البحث المطلوب مني (دور الطب العدلي في الكشف عن الجريمة) كتبته وسلمته للكلية ودخل مسابقة رحت للمسابقة ألقيت البحث وحصلت على المرتبة الثالثة اللي على أثرها كرمني السيد رئيس الجامعة [دكتور محمد الزبيدي] بحضور السيد عميد الكلية [دكتور عدنان عاجل]
كما يقولون الأوقات الممتعة تمضي سريعاً، قاربت مرحلة رابعة على الانتهاء بقن بس شهرين سوينة حفلة تخرّج وأكيد وياهة صورة تخرّج الجميل بالأمر خلوني أكعد بين الأساتذة .. هذا شي ما أتصور صاير بالكلية قبلي ، دائماً الطلبة يوكفون على المدرج والأساتذة يكعدون على كراسي لكدّام لكن آني خلوني وية الأساتذة.
رد مع اقتباس