عدنة أستاذ هواية يكول (نعم) لمن يشرح، وحدة من محاضراته ما انتبهت على شرحه كعدت أحسب له كم مرة كال نعم، طلع كايلهة 44 مرة خلال 45 دقيقة يعني كل دقيقة وثانية يكول نعم هههههههههههههههه
عدنة أستاذ هواية يكول (نعم) لمن يشرح، وحدة من محاضراته ما انتبهت على شرحه كعدت أحسب له كم مرة كال نعم، طلع كايلهة 44 مرة خلال 45 دقيقة يعني كل دقيقة وثانية يكول نعم هههههههههههههههه
أكثر مواقف مضحكة يسووهن أولاد الطالبات من يجون وية أمهاتهم، وحدة مرات تجيب ابنهة وياهة فالأخ شوية أخذ تعويد عالسالفة .. فد يوم عدنة موضوع بمادة الإلتزامات اسمه (الإلتزام غير القابل للانقسام) الأستاذ جاي يشرح مندمج دينطي مثال كال (التزام مينقسم مثل هذا الكتاب غير قابل للانقسام .. غير قابل للانقسام) الطفل هم كام يردد وياه (غير قابل للانقسام) جلّب المحاضرة كلهة يصيح (الكتاب غير قابل للانقسام) .. مرة هم كعد على المنصة مال الاستاذ واجت الاستاذة مال قانون الأحوال تريد تكومه حتى تكعد تبدي المحاضرة مقبل سوة هوسة والجماعة يكولون بصوت ناصي (عفية صكّارهم) . وحدة ثانية هم جابت ابنهة وياها خطية استاذ ديشرح كال (هذا القانون من زمن نوري السعيد) الطفل جلّب يصيح (نوري السعيد) مرتين مدري 3 بالمحاضرة هههههههههههههه
خلصت مرحلة ثانية وعطلتها الصيفية كانت مملة ماكو شي جديد حتى دورات تعليم الكومبيوتر هالعطلة ما سووها ولا رحنة للشمال لأن المنظمة مال سليمانية ما دعتنا، باختصار عطلة كئيبة بامتياز عكس القبلها بالضبط.
وصلنا مرحلة ثالثة، الكل نضج وفهم الحياة الجامعية وعرفنا بعض بشكل واضح جداً، مرحلة ثالثة كانت أصعب شي كنا نسميها (مقبرة القانون) مواد هواية وصعبة متنفهم بسهولة،.
تطور مهم صار بهالمرحلة، اجاني كاومبيوتر وتنصب عليه برنامج nvda اللي يقرأ المحتويات الموجودة بالحاسوب للمكفوف، شكّل نقطة تحوّل مهمة الية على مستوى الدراسة .. بعد من أسجل المواد ما أقلق من أقراهن لأن قبل كان كاسيت وأخاف لينقطع وبعد ميتصلح هسة صار ذاكرة هارد ممكن أحفظ نسخ من الموضوع بفلاشات واذا تلفت اللي بالهارد أسحب من الموجودة بالفلاش ، أيضاً المساحة اللي كان يحتلها صندوق المسجلات والكاسيتات فرغت لأن اللابتوب يحفظ كمية معلومات كبيرة بحجم صغير بداخله هذا غير الموسيقى والأشياء اللي أستعملهن بيه .. صح ما خليت انترنت لكن كان تطور صاروخي.
خلي نسولف على مغامرتنا الخباثية، أستاذة القانون الدولي العام كانت تخلي البنات يكعدون بالكدّام والولد نكعد بالورة، كانت المحاضرة تصير هوسة لورة حتى آني اللي أُعتبَر فقير بالنسبة لباقي الولد كنت أتوكح بالمحاضرة وأخبّث وأسوي هوسة هههههههه بعدين انتبهت على الحالة ورجعتنا مخبوطين بعد ماكو ولد لورة وبنات لكدام، عدنة مادتين كانن هوسة درجة أولى أتعس من قانون العمل فطبيعي كان الخبيث يشغل خباثته ويكفخ الكدامه مثل ما يسوي أوس صاحبي أو يشخبط على كتبه أو ينغزه بالقلم مثلي و..... ههههههه
كان عدنة شاغر ردنة نطلع بس ما خلونة لأن رئيس الجامعة جاي للكلية، المهم كالو رح يجيكم (دكتور محمد علي) يعني أستاذ قانون العمل مال مرحلة ثانية .. يعني ذكريات الهوسة مال العام هههههه ، المهم اجانة الأستاذ احنة الولد كعدنة بالورة وخلينة البنات يكعدن بالكدام، اني اتفقت وية نص الولد كلتلهم (من يطب صفكو وكولو "كلّش زين حمودّي") صدك من طب الدكتور كمنة نصفك ونصيح (كلّش زين حمّودي .. كلّش زين حمّودي) شنو رأيكم بالخباثة اللي سويتهة ؟
الجماعة رادو يضربون محاضرة التجاري، قررو يطفون الضوة مال القاعة ويسدون الباب وأي طالب يريد يفوت للقاعة يمنعوه، صدك سووهة والاستاذ اجة ما شاف أحد انزعج راح يقدم بينة عقوبة جماعية بس معاون العميد استدعى ممثل المرحلة وخلاه يقدم تعهد بعدم تكرارها مرة ثانية
وحدة من المواد اللي ندرسهن بالمرحلة الثالثة اسمها (التحقيق الجنائي والطب العدلي) هاي من اسمها كلها تشريح وسموم وأدلة وجثث (الله رجعت لأيامها كلش كلش أحبها) المهم وصلنا الى موضوع اسمه (فتح القبر وتشريح الجثة) الصبح كاعد أراجع وية اثنين من زميلاتي بالمادة وحدة منهن طبيعتها شوية تخاف احنة وصلنة لسالفة فتح القبر واخراج الجثة كان تكول (حباب حسن اعبره لأن بارحة كنت أقراه وتخيلت الميت يطلعلي ومتت خوف) ، طبعاً أخوكم خبيث ميتوصى كلتلها (اطفري ترة جوة كرسيج أكو جثة) صدك البنية انرعبت رادت الّا شوية تكمز من الخوفة، هههههههههههههههههه
اجتنا امتحانات نهاية الكورس [يعني الفصل] الأول : لازم نخلي جدول حتى تعتمده العمادة ، المهم اثنين من البنات خلو جداول وانقسمت الشعبة قسمين كل جماعة أيدو فد وحدة، ولأنهم كانن صديقات حتى ميختلفن اجوي الية علمود أحل اختلافهم لأني الوحيد اللي بعدني ما مؤيد وحدة ، المهم الأولى (حسن جدولي حلو خليت التجاري أول يوم علمود صعب حتى نقراه حباب امشي على جدولي) .. الثانية (لا حسن جدولي حلو خليت العقود أول يوم لأن تعرفه صعب وبيه سؤال فكري لازم نقراه هواية امشي على جدولي) حقيقةً احتاريتحتى أخلص من الحيرة كلتلهن (ما أمشي على جداولكم .. أمشي على الكاشي) ههههههههه حشاش
رد مع اقتباس