مرحبا حبايبي
كنت قبل وقت من الان وعدت الغالية سوزان وبعض الاعضاء بعمل كبة ولكن حدثت بعض الامور حائلا بيني وبين الكبة وتصويرها ،، واليوم بس صارلي مجال فعذرا للتأخير
نبدي بسم الله المقادير
ربع كيلو لحم مفروم
راسين بصل مفروم متوسط
باقة كرفس او معدنوس وشوي شبنت ،،، الشبنت اختياري مو الا نضيفة
كشمش اشقر هع ماحب الاسود هم اختياري ،،،، اكو بيهم ما يحبون كشمش مثل سااااااااااااامر
كمون وكركم وشوي بهارات الي تحبون بس لا تكثرون ابد
ملح حسب رغبتكم
العجينة من طحين التمن
كل كوبين طحين تمن تفورين 3 كوابه ماي وتضيفين شوي كركم وملح وكمون شوي هم
من يبدأ الماء يفور تضيفين الطحين وطفي الطباخ وقلبي وديري بصينية حتى لو مفصص من يبرد بللي ايدج وعجني وعجينته روعه وسهله وناعمه وتروح كل الفصوص الي طلعتلج بالبداية
هسه نجي للطريقة والي تضيف ماي وتسلك اللحم اذبحهه والله لان هل طريقة صارت تقليدية ومحد كام يستخدمها
العمل
في قدر نضع زيت او دهن بس مو هواي حتى لا تنفتح العجينة من تحطين حشوه ،،،
ضيفي البصل المفروم وابدي قلبي لحد ما يذبل كلش مو يحترك يذبل فد نوب قصدي
هسه ضيفي اللحم مثل ما موضحه بالصوره
قلبي لحد ما يبدي اللحم يطلع الماي مالته وغطي وقلبي كل شوي لا تتركي ابد(ماي اللحم يغنيكم هنا عن ماء السلق)
بعد ما تتاكدين انو ستوه اللحم ضيفي الكشمش
مع التقليب المستمر ايضا
من انتفخ الكشمش ونشف كلش ماي اللحم وتحسين الحشوه صارت ناشفة من الدهن والماي طفي القدر وضيفي البهارات اخر شي حتى تبقى نكهتها وملحي ،،
ومن تردين تلفين الكبة يلا تضيفين الكرفس اريد لون الكرفس الاخضر ماريده ذابل ابد وطعمه راح يطلع يجنن والله وتدعولي
عليكم الله شكله مو احلى هواي من وهو ذابل وطعمه فد شي
،،،،
بعد ما كملت عجينتي ولفيتها وهنا صارت وياي 3 طبقات يعني 32 كباية تقريبا لكل 2 كوب طحين تمن
جمدتها وقليت كم وحده مع الكبده
تحياتي ومحبتي للجميع
رد مع اقتباس
المشاركة الأصلية كتبت بواسطة Dartnyan
