ظنيت كلك وفه
وانه اعله باب العمر .. احركَ بروحي شمع
والبرد نايم بديّ
وانه احتركَ وانطفي
والشمعة من تحتركَ شتفيض غير الدمع .؟
والليل بعده طفل
خجلان من الصبح ..
والناي مابيه رحم .. يشلع بكَلبي شلع
مو يمي بس اسمعك
وامشي بأثر خطوتك .. والدرب مثل النده
من ينزل من السما ,, خطواته ما تنسمع
حاولت اجيب الصبر
وازرع صبر بالصبر ..
وارجع سنة بعشرتك .. بس انته ما تنجرع
بين الصدگ والچذب
گوّه ارد اقنع الگلّب ... يرجع يشم وردتك
بس گلّبي مثلك طلع .. تعبني ما يقتنع
بالكاس اصب القهر
وأشرب ندم قصتك ..
وادفن شعر بالورق ,, واقرالك الفاتحة
والگاك بأول فرع .!!
خليت يمك عمر
تعبان من التعب ..
وچفوف عمرك مضن بأيامي خلن طبع
لا تستعد للأمل
گاعك كلاهه الغدر ..
واحسبني مثل الورد .. بالصبخة ما أنزرع
ولا تنظر اعله السعف ..
لو شفته يم الشمس
السعفه لوما المطر .. صدگني ما ترتفع
عالم جنونك صعب
يتطشر بكل زمن .. مجموعة من الوهم
هيهات ما تنجمع..
وآنه اعله شاطي الألم... كلساعه اصد للجرح
جرح الخلگ بالجسد
بس آنه جرحي انولد
بسمار وية الضــــــــــــلع
&&&&&&&&&&&&&&&&&
رد مع اقتباس
المشاركة الأصلية كتبت بواسطة EvAnEsCeNcE
