البارحه
البارحه شفت الوطن بالطيف اجاني البارحه...
مديت اديه تسالمه شفت الكلب قبل الجفوف يصافحه...
شلون كلت يا موطني وظنوني ظلت سارحه...
وانقطع وسطي من الخجل وعيوني ظلت شابحه ...
قال اطمأن ياولدي كفتنا هي الراجحه ...
كتلة اليرد يا موطني لحضنك الدافي تسامحه!!...
كال اليرد والما يرد وحتى اليفكر بالوطن ذنوبة كلهة طايحه...
بس اليخون اميته ما يستحق نقرا على روحه الفاتحه...
كتله يبة يا موطني عندي حجي بغزر الدموع المالحه...
كال احجي كول شما كلت طبع الوطن مثل الابو واجب عليك تصارحه...
كتلة يبه يا موطني ليش انت من دون الدول صاحت عليك الصايحه؟؟...
وليش انت من دون الدول اطفالك الحلوين بالدم سابحه؟؟...
وليش انت من دون الدول بكل بيت عندك نايحه؟؟...
وليش انت من دون الدول ناسك تصبح نازحه؟؟...
وليش انت من دون الدول جيرانه كلهة تواكحه؟؟...
وليش انت من دون الدول ياثور بالعالم قوي تركض عليه تناطحه؟؟...
متكلي منه الخبلك ياابو العقول الراجحه!!...
شفته ضحك ...شفته ابتسم لمن حجى وجاوب اجابه واضحه...
قال اعتقد ياولدي...المشلكه موبالوطن ...المشكلة بالحجاج هوة الذابحه...
يبقى الوطن هوة الاصل والناس هيه الرايحه...
وخلاف الوطن تبقى البشر مثل البهايم دايحه...
كفكف دموعك يا ولدي ادري بغريب الدار شوكه جارحه...
وادري بغريب الدار كل ما يعتلي وكل صعد وشما كسب خسران كل ما رابحه...
حتى الطيور الهة وطن تهاجر لجل لمن يهزهة الشوك ترجع طافحه...
وحتى النخيل الهة وطن ما تنشتل الا بارضنا المالحه...
بس احنا نبقى لشوكت نحلم وطنا نصافحه؟؟...
والبارحة شفت الوطن بالطيف اجاني البارحه...
مع تحياتي زينب النجفية
رد مع اقتباس
