هنا

[Legend of fall]

سلام عليكم ...
خلال هذا الاسبوع كانت عندي شغلة مهمة تتطلب موافقة و تصديق السفارة العراقية في فنلندا ، السفارة العراقية هناك اعتذروا و گالوا هذي الأمور صارت من اختصاص السفارة العراقية اللي بالسويد ... يعني سفر بين إستونيا - فنلندا و إستونيا - السويد ... يعني بين إستونيا و فنلندا طريق بحري بالباخرة ساعتين .. بس للسويد ١٤ ساعة و السفر نوعا ما اكثر كلفة من فنلندا ...

المهم رحنا للسويد و أصدقائي كم نَفَر راحوا وياي عندهم تجديد جوازات و تمديد ... الخ
طبعا اول شي انتبهت عليه من شفت السفارة اللي هي بداخل فرع و برأس الفرع السفارة الكرواتية اللي العلم مالتهم بحجم نظرتهم الى بلدهم ... بحيث مستحيل ان تمشي بالشارع و ما تنتبه عليه ... العلم العراقي حجمه نص حجم العلم الكرواتي اذا مو اقل ...

دخلنا ع الإستعلامات ... الحرس اللي بالباب كال طفي تلفونك و ادخل لان ممنوع استخدام التلفون بداخل السفارة ( بهالاثناء اسمع كافة نغمات الاتصالات من داخل السفارة ، فايبر على مسنجر على واتساب على تلفون ارضي ) دخلت .. طبعا حجم المراجعين اكثر بمرتين من حجم السفارة و طبعا الله يعين الناس الخيرين اللي بالسفارة ...

كل كادر السفارة ... اللي جذبوا انتباهي من الناحية الإيجابية هم اثنين يشتغلون هناك لان ع الأقل انيقين و مرتبين و تعاملهم مع الناس باخلاق ( واحد منهم اسمه علي ) .. اما البقية ...
بديت أفكر بان كل تضحيات الجيش و الحشد و الشباب اللي دتروح لأجل كرامتي و كرامتك و كرامتچ ، هاي الكرامة من الممكن ان تُجرح او تُهان من قبل ( بعض ) العاملين هناك و جدا طبيعي ...

اللي صار انه احد الموظفين ، طبعا هو من الإقليم و مع احترامي لأصدقائي الكورد ، عمره بالخمسينيات ، اللغة العربية اللي يتكلمها غير مفهومه و طبعا هو ماسك كاونتر استلام معاملات ... أني واكف أمامه ١٤ ساعة بالبحر و كانت عاصفة بيومها و بدون ريوگ ( ريوگ يعني فطور ... بالمحافظات ) يعني شبه زومبي... گال روح استنسخ جوازك .. و صورتين و روح لهذا مكتب الاستنساخ ... رجعت انطيته المستمسكات و الصورتين و بابتسامة ... الصورتين مكانوا مگصوصين بمگص يعني صايرات على شكل طبقة و المكص قريب عليه هو ... فرمى المگص علية و گال ( گصهم بإيدك لو انتوا متعلمين احنه نشتغل خدم عندكم ؟ )

فكان جوابي ( انت وظيفتك ان تخدم الا اذا ظهرك قوي و الظاهر هو هيج ... فاني الخادم مالتك و تأمرني )


و اللي ضايج من الوضع بالعراق ... خل يروح لليونان تهريب ، و يوصل السويد ... يروح للسفارة العراقية اللي بستوكهولم ... يشوفها و يرجع للعراق ... لان وضع ابسط دائرة في اي ريف عراقي اكثر وقار و هيبة و احترام من السفارة العراقية اللي هناك ...

ها صدگ ، شغلتي ما صارت ....

[أزل]

يووه فشلونة عزة العزاهم

صدك ذولة شبعوا فلوس بعد ما يفكرون بالناس

حسبي الله ونعم الوكيل منهم ..

[سورين]

الله يساعدكم والله ..
كل الي سافروا خارج العراق فوكَـ الغربة متعذبين

[Aabdullah]

نفس الاخلاق.. حتى هنا بالعراق اذا تراجع دائرة حكومية يخلوك تفقد انسانيتك
المشكلة مشكلة اخلاق.. ثقافة عدم القبول بالاخر هي سبب الازمة الي وصلتنا الى هذا الحال..

شكرا

[الياسمين]

سبحان الحياة ا المحترمة الراقية في الغرب ما علمت العربي كيف يكون انسان
كيف يستحق أن يعيش تلك الحضارة الراقية
فعلا كما قال احدهم العربي يذهب الى الغرب بفكره وثقافته بعنصريته و أقصائه بجهله و تخلفه الحضاري
وطبعا هو لا يمارس ثقافته العدائية إلا على أخيه العربي

[رحيـــل]

اما ردي فهو السكوت

ماصارت /: الله يصير امثالهم للجحيم

[د. حسن سعيد]

الله يرحمك معروف الرصافي لا فُضَّ فوكَ حين قُلت (عَلَمٌ ودستورٌ ومجلسُ أُمَّةٍ ، كُلٌّ عن المعنى الصحيحِ مُحَرَّفُ)
تعليقي .............. مرح أتكلم أكثر من هذا احتراماً للناس الطيبين هنا تحياتي ومنور صديقي الراقي ولو انت مغلس متسأل هاي وحدة عليك

[Scrap]

الله يعينكم ويصبركم
هاي فوگ الغربة هيچ يعاملون الناس

[Legend of fall]

يووه فشلونة عزة العزاهم

صدك ذولة شبعوا فلوس بعد ما يفكرون بالناس

حسبي الله ونعم الوكيل منهم ..

حي الله الجبورية ...
مثل ما كَال الاخ ...نمر بأزمة اخلاق رهيبة و هذي احدى افرازاتها ...
نورتي الموضوع ..

[Legend of fall]

الله يساعدكم والله ..
كل الي سافروا خارج العراق فوكَـ الغربة متعذبين

تخيلي عدد اللاجئين اللي هم اساسا يراجعون السفارة ( سكتاوي ) و المصاريف اللي توازي المعونة الاجتماعية اللي يحصلوها في بلدهم و علاوة على ذلك المعاملة الجافة من قبل الاخوة في الوطن اللي في السفارة