١٩٧٢/٧/٥
_____________________
ظل
ظل غريب
يا گلب دافي علئ دمي تغيب
يا لحن يعزف علئ روحي تراتيل الخناجر و الصليب
يا ضمير ، صلي بجروحي تشوف ...
اجروحي من تكثر تطيب
يا عمر تنشد زمانك ع الليالي اللي تجيب ...
اوما تجيب !
ظل غريب (-ما هي جنتك بيك تمشي،
أوبيك تصدح كل اغاني العندليب !)
ظل غريب
إِبلا مواويل او قوافي
ظل علئ الذكرى التجيك اظنون غافي
ظل على البوسه شفايف،
بيها تلهث كل شرايينك عوافي
ظل هواجس بيضه ما تحزن عليك ،
اشما صدئ اظنونك يخيب
ظل غريب (-شلك ابظل تعثر ادروبك عليه
و تعثر انت من يغيب؟!)
ظل غريب
لا تصافي اولا تغيظ
اولا قوافيك تشح بيك اوتفيض
اولا رماد اسنينك ايطشك على اترابك سراب
كافي تحزن ، كافي تفرح
كافي تسكت، كافي تصرخ
كافي تتحير علئ الدهشه التجيك ابكل غريب
ظل غريب (وحدك ايقاعك علئ الوحشه حبيب)
ظل غريب
لا نبع ،لا شط، لا مصب
لا شمس، لا عين ، لا حب ، لا غضب
لا حلم ، لا شوف ، لا هم، لا سبب
لا ورد يذبل عليك
لا ذنب يزحف بيدك
اولا ندم فايض علئ اضفافه النحيب
ظل غريب (احلئ ما بالدنيه وحشه
زخه لاع الگاع نزلت
اولا لگت غيمتها من ردت علئ السچه التغيب !)
ظل غريب
ظل....
ظل غريب .





شاكر السماوي